დეპუტატი სალომე სამადაშვილი ნიკა მელიას გირაოს თანხის გადახდას ეხმაურება და აცხადებს, რომ ეს „ევროკავშირის უპრეცედენტო ნაბიჯია“.

სამადაშვილის თქმით, ამაზე დიდი მხარდაჭერა „პოლიტიკური პატიმრის გასათავისუფლებლად“, უცნობია.

„ევროკავშირის უპრეცედენტო ნაბიჯი: გუშინ საღამოს, ევროპული დემოკრატიის ფონდის დირექტორთა საბჭოს საგანგებო სხდომამ, რომელიც ერთი საათში დაორგანიზდა, დაამტკიცა ნიკას გირაოს დაფარვა. ამაზე დიდი მხარდაჭერა პოლიტიკური დევნის შესაწყვეტად და პოლიტიკური პატიმრის გასათავისუფლებლად, უცნობია, ჩემთვის, პირადად. დიდი მადლობა ფონდს, რომლის შექმნის იდეის განხორციელებაშიც აქტიურად ვმონაწილეობდი ბრუსელში 2012-2013 წლებში”, - წერს სალომე სამადაშვილი სოციალურ ქსელში.

შეგახსენებთ, რომ საქართველოში ევროკავშირის წარმომადგენლობის ინფორმაციით, ნიკა მელიას გირაოს თანხა, 40 ათასი ლარი გადახდილია. ნიკა მელიას გირაოს თანხა „ევროპულმა ფონდმა დემოკრატიისთვის“ გამოყო და ხელისუფლებას საია-მ გადასცა.