ოკუპირებულ აფხაზეთში 12 მაისიდან რუსული წარმოების „სპუტნიკით“ მოსახლეობის ვაქცინაცია იწყება. ამის შესახებ დე ფაქტო რესპუბლიკის ე.წ. ჯანდაცვის მინისტრის მოადგილე ვახტანგ ვარდანიამ ადგილობრივ მედიას განუცხადა.

რუსული ვაქცინის პირველი პარტია ოკუპირებულ აფხაზეთში 30 აპრილს ჩაიტანეს.

„ვაქცინაციის ფართი აფხაზეთის ყველა რაიონში ცენტრალური საავადმყოფოების ბაზებზეა გამზადებული. აცრები ხვალიდან დაიწყება“ , - განაცხადა ვარდანიამ.

მისი თქმით, სოხუმში ვაქცინაციის სამი პუნქტი იმუშავებს, სადაც, პირველ რიგში, მედიცინის მუშაკებს აცრიან, შემდეგ კი იმ პროფესიის წარმომადგენლებს, რომლებიც მაღალი რისკის ჯგუფებში შედიან: მასწავლებლებს, სოციალურ მუშაკებს, სამართალდამცავებს, შემდეგ კი რიგით მოქალაქეებს.

დე ფაქტო მინისტრის მოადგილის თქმით, აფხაზეთის მცხოვრებლები ჯერ დიდ აქტივობას არ იჩენენ აცრებისადმი. თუმცა, მისი თქმით, არიან ისეთები, ვინც ამ ვაქცინებს დიდხანს ელოდა.

ოკუპირებულ აფხაზეთში პანდემიის დაწყებიდან დღემდე კორონავირუსის 14 834 შემთხვევა დაფიქსირდა, გამოჯანმრთელდა 13 823 ადამიანი.