ოკუპირებულ აფხაზეთში დღეიდან რუსული ვაქცინა „სპუტნიკის“ გამოყენებით მოსახლეობის ვაქცინაცია დაიწყო, - ამის შესახებ ინფორმაციას ადგილობრივი მედია ავრცელებს.

მათივე ინფორმაციით, ვაქცინაცია სოხუმის #1 პოლიკლინიკის ბაზაზე დაიწყო და დღის განმავლობაში 14 ადამიანი აიცრა.

პოლიკლინიკის მთავარი ექიმის განცხადებით, ვაქცინაციისთვის მოქალაქეებს თან უნდა ჰქონდეთ აფხაზური ე.წ. პასპორტი, დედაქალაქის მაცხოვრებლებს კი - ე.წ. ადგილობრივი რეგისტრაციის მოწმობა.

ცნობისათვის, ოკუპირებულ აფხაზეთში რუსული ვაქცინა „სპუტნიკის“ 6 500 დოზა 30 აპრილს ჩაიტანეს. ბოლო მონაცემებით, რეგიონში, პანდემიის დაწყებიდან დღემდე კორონავირუსის 14 834 შემთხვევაა დაფიქსირებული, გამოჯანმრთელდა 13 823 და დაიღუპა 224 ადამიანი.