საარჩევნო რეფორმასთან დაკავშირებით პრინციპული საკითხები შეჯერებულია, - ამის შესახებ ჟურნალისტებთან „გირჩის“ ერთ-ერთმა ლიდერმა იაგო ხვიჩიამ საარჩევნო რეფორმაზე მმართველი გუნდისა და ოპოზიციის შეხვედრის დაწყებამდე განაცხადა.

როგორც მან აღნიშნა, არსებობს საკითხები, რაზეც დისკუსია კვლავ მიმდინარეობს, თუმცა, ეს საკითხები კანონპროექტის შინაარსს ფუნდამენტურად ვერ შეცვლის. მისი თქმით, ერთ- ერთი ასეთი საკითხი ცესკო-ს თავმჯდომარის მოადგილის საკითხია.

„ჩვენ შეხვედრები გვაქვს კანონპროექტის პრინციპებზე, მიუხედავად იმისა, რომ კამათი არსებობს რამდენიმე საკითხზე ვიწრო კონტექსტით, ვფიქრობ, კონსენსუსის მიღწევა იქნება შესაძლებელი. ამ წუთისთვის ყველაფერზე შევჯერდით და რაზეც ვერ შევჯერდით, ვთქვით, რომ გავაგრძელებთ მსჯელობას კომიტეტზე. პრინციპული საკითხები შეჯერებულია, არსებობს საკითხები, რაზეც დისკუსია მიმდინარეობს, მაგრამ ფუნდამენტურად ეს ვერ შეცვლის კანონპროექტის შინაარსს,"- განაცხადა ხვიჩიამ.