ერთი თავისუფალი ადამიანის და მოსამართლის შესვლაც იუსტიციის საბჭოში ნიშნავს უდიდეს ზიანს „კლანისთვის“, ამიტომ ცდილობენ ბოლომდე ჩაებღაუჭონ მართვის შესაძლებლობას, - ასე აფასებს ,,მოქალაქეების” ლიდერი ანა დოლიძე იუსტიციის უმაღლესი საბჭოს მიერ ოთხი მოსამართლე წევრის არჩევას. მისი განცხადებით, სასამართლოში „კლანის მმართველობაზე“ პასუხისმგებლობა პირველ რიგში „ქართულ ოცნებას“ ეკისრება.

„ჩვენ უნდა გავიაზროთ, რომ უპირველესი პასუხისმგებლობა „კლანზე” აქვს ჩვენს ხელისუფლებას, „ოცნება” სულ ცდილობს ხელები დაიბანოს და თქვას, რომ „კლანი” განაგებს იქ ვითარებას. მათ თავისუფლებად შეეძლოთ თუნდაც შარლ მიშელის შეთანხმებიდან გამომდინარე შეეჩერებინა ეს პროცესი.

26 მაისს, დასვენების დღეს საბჭოთა სტილის არჩევნებში სადაც, არავითარი დისკუსია, პროგრამული განხილვა და შეჯიბრი არ ყოფილა იმიტომ აირჩია „კლანმა“ მოსამართლეები, რომ ებღაუჭება ძალაუფლებას სასამართლოში. ერთი თავისუფალი ადამიანის და მოსამართლის შესვლაც იუსტიციის საბჭოში ნიშნავს უდიდეს ზიანს „კლანისთვის“, ამიტომ ცდილობენ ბოლომდე ჩაებღაუჭონ იუსტიციის საბჭოს მართვის შესაძლებლობას”, - აღნიშნა ანა დოლიძემ.

ცნობისთვის, იუსტიციის უმაღლესი საბჭოს ოთხ მოსამართლე წევრად თემურ გოგოხია, ლევან მიქაბერიძე, ბადრი შონია და გოჩა აბუსერიძე აირჩიეს. მათ კანდიდატურას მოსამართლეთა რიგგარეშე XXIX კონფერენციაზე მხარი მოსამართლეთა კორპუსის უმრავლესობამ დაუჭირა. ოთხივე მათგანი იუსტიციის უმაღლესი საბჭოს მოსამართლის თანამდებობაზე 4 წლის ვადით აირჩიეს.