არ გვაქვს ილუზია, რომ „ქართულ ოცნებას" აქვს პოლიტიკური ნება კორუფციას ებრძოლოს - კანონპროექტის ინიცირებით კიდევ ერთხელ გამოჩნდება „ქართული ოცნების" რეალური სახე,- ამის შესახებ ფრაქცია "ლელო - პატრნიორობა საქართველოსთვის" წევრმა სალომე სამადაშვილმა ჟურნალისტებთან პარლამენტში, არასამთავრობო სექტორთან შეხვედრის დაწყებამდე განაცხადა.
როგორც მან აღნიშნა, "ლელო" დააინიცირებს კანონპროექტს, რომელიც ანტიკორუფციული სააგენტოს შექმნას ითვალისწინებს. სამადაშვილის თქმით, კორუფციაზე, როგორც სერიოზულ გამოწვევაზე საუბრობენ ქვეყნის პარტნიორებიც და მათ საერთაშორისო მხარდაჭერის მოლოდინი აქვთ.
„სამწუხაროდ, გასული ცხრა წლის განმავლობაში, წლიდან წლამდე, ქვეყანაში კორუფციის პრობლემა ღრმავდება და ეს ნახეთ, მათ შორის საერთაშორისო ორგანიზაციების შეფასებებით. საქართველოში კორუფციის მასშტაბი იზრდება და ქვეყნის მომავალს და განვითარებას საფრთხეს უქმნის. ასეთი კანონპროექტი რომელიმე წინა პარლამენტს რომ მიეღო, შესაძლოა, მძლავრი მექანიზმები გვქონოდა კორუფციასთან ბრძოლის თვალსაზრისით. ცხადია, როცა ეს პრობლემა გაღრმავდა, დღის წესრიგში უფრო აქტუალური გახდა მსგავსი კანონპროექტის მიღება. ვაპირებთ, რომ ეს კანონპროექტი დავაინიციროთ,"- განაცხადა სამადაშვილმა.