სწორია „ლელოს" პოზიცია, რომ სჯობს, მერობის კანდიდატი საკუთარი რიგების მიღმა ეძებონ - იმ სპექტრში, რომელსაც ისინი და ჩვენი ოპოზიცია წარმოადგენს, არ არის კანდიდატი, რომელიც „ქართული ოცნების" კონკურენტი იქნება,- ამის შესახებ ჟურნალისტებთან საპარლამენტო უმრავლესობის წევრმა შალვა პაპუაშვილმა განაცხადა.

მისი თქმით, ვინც პოლიტიკაში მიდის, თუნდაც, სხვა პროფესიიდან, ის უკვე პოლიტიკოსი ხდება და გამიჯვნა, რომ ცუდი ადამიანები არიან პოლიტიკოსები და კარგი ადამიანები - არაპოლიტიკოსები, მიამიტური მიდგომაა.

„პარტიების რეიტინგი 31 ოქტომბერს გავზომეთ და ყველამ იცის, მოსახლეობაში რა წონა აქვს. ამის შემდეგ რამდენიმეთვიანი კამპანია ვიხილეთ, როცა ოპონენტები პარლამენტში არ შემოდიოდნენ. ვნახეთ, ამ კამპანიის დასასრული, რომ მათ მოუწიათ, მარცხის აღიარება და პარლამენტში შემოსვლა. აქედან დასკვნა მარტივია, ვის აქვს ძლიერი პოზიციები - "ქართულ ოცნებას" თუ ოპოზიციას. ეს ფაქტი გვაჩვენებს, რომ შეგვიძლია, მშვიდად ვიყოთ, რადგან "ქართული ოცნება" ისევ დამაჯერებლად გაიმარჯვებს თვითმმართველობის არჩევნებში, როგორც საპარლამენტო არჩევნებში,"- განაცხადა პაპუაშვილმა.