ოკუპირებულ აფხაზეთში ე.წ. რუსეთის საელჩო დე ფაქტო ხელისუფლებას მოუწოდებს, გააძლიეროს პროფილაქტიკური მუშაობა, რომელიც ოკუპირებულ რეგიონში რუსეთის მოქალაქეების დასაცავად იქნება მიმართული. ამის შესახებ საუბარი ე.წ. საელჩოს „ფეისბუკის“ გვერდზე გავრცელებულ ინფორმაციაშია, რომელიც ბიჭვინთაში სამშაბათს რუსეთის ორი მოქალაქის დაჭრის ფაქტს უკავშირდება.

„იძულებული ვართ დავაფიქსიროთ, რომ ეს პირველი რეზონანსული შემთხვევა არ არის, როდესაც რუს ტურისტებს რესპუბლიკაში თავს ესხმიან. მოვუწოდებთ აფხაზეთის ხელისუფლებას, სწრაფად დაასრულონ საგამოძიებო მოქმედებები და დასაჯოს დამნაშავეები, ასევე გააძლიეროს პროფილაქტიკური სამუშაოები, რომლებიც მიმართულია კრიმინალის წინააღმდეგ, უპირობოდ უზრუნველყონ რუსეთის მოქალაქეების უსაფრთხოება დაწყებული ტურისტული სეზონის გათვალისწინებით“ , - აღნიშნულია ე.წ. საელჩოს განცხადებაში.

დე ფაქტო უწყების განცხადებით, აღნიშნული საქმე განსაკუთრებული კონტროლის ქვეშ ჰყავთ აყვანილი.