ეკონომიკისა და მდგრადი განვითარების მინისტრის მოადგილე, მარიამ ქვრივიშვილი ავიაკომპანია „ევროვინგსის“ ხელმძღვანელობას შეხვდა. ამის შესახებ ინფორმაციას ეკონომიკის სამინისტრო ავრცელებს. როგორც ქვრივიშვილმა შეხვედრის დასრულების შემდგე განაცხადა, შეხვედრაზე მოლაპარაკება ქუთაისის საერთაშორისო აეროპორტიდან ახალი ევროპული მიმართულებით შესაძლო ოპერირებას შეეხო.

„ავიაკომპანია „ევროვინგსის" პირველ რეისით თბილისს ავიაკომპანიის მმართველი გუნდი ეწვია. ჩვენ მათთან შეხვედრის შესაძლებლობა გვქონოდა, რომელიც საკმაოდ ნაყოფიერი იყო. შეხვედრისას ვისაუბრეთ, რომ გაფართოვდეს „ევროვინგსის" დაფარვის ზონა საქართველოში და თბილისის გარდა, მათ ასევე იფრინონ ქუთაისის განახლებულ აეროპორტში. ჩვენ ვხედავთ, რომ მზარდია მოთხოვნა „ევროვინგსის" რეისზე თბილისის მიმართულებით. სწორედ ამიტომაც მოლაპარაკება შეეხო ახალი ევროპული მიმართულებით შესაძლო ოპერირებას ქუთაისის საერთაშორისო აეროპორტიდან," - განაცხადა ეკონომიკისა და მდგრადი განვითარების მინისტრის მოადგილემ მარიამ ქვრივიშვილმა ავიაკომპანია „ევროვინგსის" წარმომადგენლებთან შეხვედრის შემდეგ.

სამინისტროს ინფორმაციით, შეხვედრაში „ევროვინგსის" საავიაციო ბიზნესგანვითარების მენეჯერი, ივან ორეკი და საქართველოს აეროპორტების გაერთიანების დირექტორი, თამარ არჩუაძე მონაწილეობდნენ.

ცნობისთვის, დღეიდან ევროპის წამყვანმა დაბალბიუჯეტურმა ავიაკომპანია „ევროვინგსმა" დიუსელდორფიდან თბილისის მიმართულებით პირველი რეისი შეასრულა. ავიაკომპანია აღნიშნულ რეისზე ოპერირებას კვირაში ორი სიხშირით მოახდენს. ფრენები ყოველ ოთხშაბათსა და კვირას AIRBUS A320 ტიპის საჰაერო ხომალდით შესრულდება.