ამ შემთხვევაში, ეს არის ხელიდან გაშვებული შესაძლებლობა, რადგან ჩვენ შეგვეძლო დაგვენიშნა კონსენსუსით შერჩეული ცესკო-ს თავმჯდომარე, რაც სისტემის მიმართ ნდობას საგრძნობლად გაამყარებდა ოპოზიციის და საზოგადოების მხრიდანაც, - ამის შესახებ ფრაქცია „ლელო-პარტნიორობა საქართველოსთვის“ წევრმა სალომე სამადაშვილმა „ინტერპრესნიუსს“ განუცხადა.
სამადაშვილი მიიჩნევს, რომ ცენტრალური საარჩევნო კომისიის თავმჯდომარის შერჩევის საკითხში „ქართული ოცნების“ გავლენა ჩანს.
მისი თქმით, ხელისუფლებამ ისევ გაუშვა ხელიდან ეს შესაძლებლობა და ცესკო-ს მოქმედი თანამშრომლები შეარჩია, რომელთაც ოპოზიცია მხარს არ უჭერს.
„უფრო სწორი იქნებოდა პრეზიდენტს ამ თემაზე, თუ დამოუკიდებლად იღებდა გადაწყვეტილებას, შეხვედრა გაემართა ოპოზიციასთანაც. ვფიქრობ, რომ „ქართული ოცნების“ გავლენა იკვეთება“, - განაცხადა სალომე სამადაშვილმა.
პრეზიდენტის განკარგულებით შექმნილმა საკონკურსო კომისიამ ცესკო-ს თავმჯდომარეობის ორი, ხოლო წევრობის ხუთი კანდიდატი შეარჩია. კომისიის გადაწყვეტილების თანახმად, ცესკოს თავმჯდომარეობის კანდიდატები არიან გიორგი კალანდარიშვილი და გიორგი სანტურიანი. რაც შეეხება წევრობის კანდიტატებს, - კომისიამ გია ცაცაშვილი, ანა მიქალაძე, ლელა ტალიური, მაია ზარიძე და თამარა სართანია წარადგინა.