შეფასების და გამოცდების ეროვნული ცენტრის ხელმძღვანელის სოფიო გორგოძის განაცხადებით, 2021 წლის ერთიანი ეროვნული გამოცდები 201-მა ინფიცირებულმა აბიტურიენტმა ჩააბარა.
მისივე თქმით, 2021 წლის ერთიანი ეროვნული გამოცდები განსაკუთრებით ხანგრძლივი საგამოცდო პროცესით გამოირჩეოდა, რადგან პანდემიიდან გამომდინარე ჯამში 47 საგამოცდო სესია ჩატარდა, აქედან 34 ძირითადი, ხოლო 13 დამატებითი სესია იყო.
"დღეს სრულდება ერთიანი ეროვნული გამოცდების ჩატარება კონკრეტულად ინფიცირებული აბიტურიენტებისათვის. ეროვნული გამოცდები 1 ივლისს დაიწყო და 2 აგვისტოს ჩათვლით გაგრძელდა. შეიძლება ითქვას, რომ ეს იყო ყველაზე ხანგრძლივი საგამოცდო პროცესი აბიტურიენტებისთვის ამ წლების მანძილზე და რა თქმა უნდა, ეს გახლდათ სწორედ პანდემიიდან გამომდინარე, ვინაიდან ჩვენ პირველად წელს დამატებითი სესიების ჩატარება მოგვიხდა. ერთიან ეროვნულ გამოცდებზე ამ ხნის მანძილზე სულ ჩატარდა 47 საგამოცდო სესია, ტესტის სხვადასხვა ვარიანტების მიხედვით, აქედან 34 იყო ძირითადი სესია, ხოლო 13 დამატებითი სესია ინფიცირებული აბიტურიენტებისათვის.
რაც შეეხება გამოცხადებას, აბიტურიენტების საშუალოდ 94% სხვადასხვა გამოცდაზე გამოცხადდა. გარდა ამისა, გვქონდა დაგვიანების 70- მდე ფაქტი და გამოცდიდან მოხსნის ერთეული შემთხვევები დამხმარე მასალის გამოყენების გამო.
რაც შეეხება ინფიცირებულთა სტატისტიკას, 201- მა აბიტურიენტმა ჩააბარა დამატებითი გამოცდა, ანუ საბოლოო ჯამში 201 ინფიცირებული გვყავდა. ეს გახლავთ უნიკალური აბიტურიენტი, რომელთაც შემდეგ სხვადასხვა გამოცდები ჩააბარეს",- განაცხადა გორგოძემ.
