15 წლის  ლუკა სირაძის გარდაცვალების საქმეზე  მსჯავრდებული გამომძიებელი მარიანა ჩოლოიანი საპატიმროდან გაათავისუფლეს

15 წლის მოზარდის, ლუკა სირაძის გარდაცვალების საქმეზე მსჯავრდებული გამომძიებელი მარიანა ჩოლოიანი საპატიმრო დაწესებულებიდან გაათავისუფლეს.

ჩოლოიანის საკითხზე ვადაზე ადრე გათავისუფლების („უდო“) კომისიამ იმსჯელა.

დაკავებული გამომძიებელი გუშინ გათავისუფლდა.

მარიანა ჩოლოიანის ადვოკატის, მერაბ ჩიქოვანის განცხადებით, მსჯავრებული გამომძიებლის გათავისუფლება კანონის საფუძველზე დადგენილი კრიტერიუმებით მოხდა.

როგორც ჩიქოვანმა ჟურნალისტებს განუცხადა, თავდაპირველად, პენიტენციური სამსახურის ადგილობრივმა საბჭომ ჩოლოიანის გათავისუფლებასთან დაკავშირებით ორჯერ იმსჯელა, პირველ შემთხვევში კანონდარღვევით, რაც სასამართლოში გასაჩივრდა.

„ჩოლოიანი გათავისუფლდა კანონის საფუძველზე, კანონით დადგენილი კრიტერიუმების საფუძველზე. მოგეხსენებათ, რომ ნებისმიერ პენიტენციურ დაწესებულებაში მყოფ პატიმარზე გარკვეული ვადის გასვლის შემდგომ სავალდებულოდ ხორციელდება მისი პირობით ვადამდე გათავისუფლების საკითხის განხილვა. შესაბამისად, პენიტენციური სამსახურის ადგილობრივმა საბჭომ იმსჯელა რა აღნიშნულ საკითხზე, მიიღო უარყოფითი გადაწყვეტილება მარიანა ჩოლოიანის მიმართ, მის გათავისუფლებასთან დაკავშირებით. ამის შემდგომ აღნიშნული გადაწყვეტილება ჩვენს მიერ გასაჩივდა სასამართლოში ადმინისტრაციული წესით. სასამართლოში განხილვის შედეგად ბათილად იქნა ცნობილი ადგილობრივი საბჭოს გადაწყვეტილება და საბჭოს კვლავ დაუბრუნდა განსახილველად ეს საკითხი. სასამართლომ ბათილად ცნო საბჭოს გადაწყვეტილება იმის გამო, რომ კანონი იყო დარღვეული მარიანა ჩოლოიანის მიმართ. ამის შემდეგ საბჭომ იმსჯელა კანონის საფუძველზე და მიიღო მარიანა ჩოლოიანის გათავისუფლების გადაწყვეტილება“, - განაცხადა მერაბ ჩიქოვანმა.

ცნობისთვის, 15 წლის ლუკა სირაძემ პოლიციაში გამოკითხვის შემდეგ სიცოცხლე თვითმკვლელობით დაასრულა. აღნიშნულ საქმესთან დაკავშირებით, მოზარდის მიმართ ჩვენების იძულების ბრალდებით პოლიციის გამომძიებელი მარიანა ჩოლოიანი დააკავეს. 2020 წლის 7 სექტემბერს, დაკავებულ გამომძიებელს, თბილისის საქალაქო სასამართლომ 3 წლით თავისუფლების აღკვეთა მიუსაჯა. ლუკა სირაძის საქმეზე სახელმწიფო ინსპექტორის სამსახურმა, პოლიციის კიდევ რამდენიმე თანამშრომლის მხრიდან ადმინისტრაციული გადაცდომა გამოკვეთა.

დიმიტრი შველიძე - ახლა პოლიტიკური ელიტა იდეებისაგან დაცლილია, ფულის ფაქტორი გადამწყვეტია, სოციალური პოლარიზაცია უძლეველია და კაცმა არ იცის, ელექტორატის უმრავლესობა ვის უჭერს მხარს
ქართული პრესის მიმოხილვა 22.09.2021
თენგიზ ფხალაძე - საშიშ ფაზაში ვიმყოფებით, მსოფლიოში მიმდინარე პროცესები ყურადღების მიღმა გვრჩება, ყველაფერს ვაკეთებთ სახელმწიფოს ჩამოსაშლელად, მოწინააღმდეგეს მხოლოდ ისღა რჩება, რომ ამ პროცესში ხელი არ შეგვიშალოს
„კასტელო მარე“ ზაფხულის წარმატებული სეზონის შემდეგ საშემოდგომო სეზონისთვის ემზადება
„უმალი“ გაყინული თევზის ბაზარზე შესვლას გეგმავს
დიდი ფასდაკლება შერჩეულ პროდუქციაზე - სექტემბრის ტოპ შეთავაზება „მიჰაუსისგან“
კომპანია “ლისი რეკრეაცია” ლისის ტბასთან დაკავშირებით ინფორმაციას ავრცელებს