125 კილოგრამ წონით კატეგორიაში ქართველმა მოჭიდავემ გენო პეტრიაშვილმა ტოკიოს ოლიმპიადაზე ვერცხლის მედალი მოიპოვა.

ფინალში გენო პეტრიაშვილი აშშ-ის წარმომადგენელთან, დენ გეიბლ სტივსონთან დაძაბულ ბრძოლაში, ანგარიშით 8:9 დამარცხდა. აღსანიშნავია, რომ 21 წლის ამერიკელმა მეოთხედფინალში მოქმედი ოლიმპიური და ევროპის ჩემპიონი, თურქი ტაჰა აკგული დაამარცხა.

საწყის შეხვედრაში პეტრიაშვილმა ეგვიპტელი დიაელდინ კამალ გოუდა აბდელმოტალები 11:0 დაამარცხა, ხოლო მეოთხედფინალში ჩინელ ჟივეი დენგს ანგარიშით 5:2 სძლია.

შეგახსენებთ, ეს პეტრიაშვილის მეორე ოლიმპიური მედალია - 2016 წელს, რიო დე ჟანეიროს ოლიმპიურ თამაშებზე ქართველმა მოჭიდავემ ბრინჯაოს მედალი მოიპოვა.

ამ წუთისთვის საქართველოს ნაკრები მიმდინარე ოლიმპიადაზე 8 მედლით (2 ოქრო, 5 ვერცხლი, 1 ბრინჯაო) საერთო გუნდურ ჩათვლაში 24-ე ადგილს იკავებს.