მიხეილ სარჯველაძე - სახალხო დამცველის განცხადება სრულად ემთხვევა ოპოზიციური პარტიების ინტერესს, რომლებიც არჩევნებში განწირული არიან მარცხისთვის - ეს არის მათთვის გადაგდებული ერთგვარი სამაშველო რგოლი
სახალხო დამცველის განცხადება სრულად ემთხვევა ოპოზიციური პარტიების ინტერესს, რომლებიც თავის მხრივ, განწირულნი არიან მარცხისთვის ამ არჩევნებზე - ეს არის მათთვის ნებსით თუ უნებლიედ, გადაგდებული ერთგვარი სამაშველო რგოლი,- ასე აფასებს ადამიანის უფლებათა დაცვის კომიტეტის თავმჯდომარე მიხეილ სარჯველაძე ჟურნალისტებთან სახალხო დამცველის ნინო ლომჯარიას განცხადებას, რომელიც მიიჩნევს, რომ მსგავს ეპიდემიურ სიტუაციაში არჩევნების ჩატარების მიზანშეწონილობის თაობაზე დისკუსია უნდა დაიწყოს.
სარჯველაძის განცხადებით, სწორედ ამიტომ აჰყვა მის განცხადებას ოპოზიცია ორკესტრირებულად.
„უნდა გვახსოვდეს, რომ ამ განცხადების უკან დგას პრაქტიკულად მოთხოვნა საგანგებო მდგომარეობის გამოცხადებაზე, სხვაგვარად არჩევნების გადადება კონსტიტუციის მიხედვით შეუძლებელია, ეს არის მოცემულობა. გამოდის, სახალხო დამცველი ითხოვს საგანგებო მდგომარეობის გამოცხადებას იმ ფონზე, როცა პრაქტიკულად, წინასაარჩევნო კამპანიის ჩატარების, უშუალოდ არჩევნების დღის პროცედურების და ეპიდემიოლოგიურ მდგომარეობასთან დაკავშირებული რისკების ერთმანეთთან დაკავშირება რეალურად შეუძლებელია. რეალურად შესაძლებელია, რომ არჩევნების კენჭისყრის დღეც, წინასაარჩევნო კამპანიაც, სრულფასოვნად ჩატარდეს ისე, რომ ეს ყველაფერი თავსებადი იყოს ეპიდემიოლოგიური მდგომარეობიდან გამომდინარე არსებულ რეგულაციებთან. თუ ეს შესაძლებელია, არგუმენტირებული აღარ გამოდის ის მოთხოვნა, რომელიც უკავშირდება არჩევნების სხვა დროს ჩატარებას. ვერ გეტყვით, რით არის მოტივირებული ეს განცხადება, მაგრამ ეს სრულად ემთხვევა იმ ინტერესს, რომელიც აქვთ ოპოზიციურ პარტიებს, რომლებიც თავის მხრივ, განწირულნი არიან მარცხისთვის ამ არჩევნებზე, ამიტომ ეს არის მათთვის ნებსით თუ უნებლიედ, გადაგდებული ერთგვარი სამაშველო რგოლი, ეს არის ფაქტი, რომ ასე გამოვიდა, ამიტომაც ამას ორკესტირებულად აჰყვა ოპოზიციის დიდი ნაწილი,“- განაცხადა სარჯველაძემ.
v-if="article.gallery" v-html="article.gallery"
