თუ საქართველომ ევროკავშირის მაკროფინანსური დახმარება ვერ მიიღო, ამაზე პასუხისმგებელი იქნება ხელისუფლება - ევროკავშირის წარმომადგენლები აფრთხილებდნენ “ქართულ ოცნებას”, რომ ეს დახმარება კავშირშია იმ რეფორმებთან, რომელზეც პასუხისმგებლობა აიღეს, - ამის შესახებ “მოქალაქეების” დეპუტატმა ლევან იოსელიანმა ჟურნალისტებთან განაცხადა, რითაც გამოეხმაურა მაკროფინანსურ დახმარებასთან დაკავშირებით ოპოზიციის განცხადებებს.
როგორც მან აღნიშნა, მნიშვნელოვანია "ქართულმა ოცნებამ" ბოლომდე მიიყვანოს ის რეფორმები, რომელზეც პასუხისმგებლობა აიღო.
“ტექნიკური ხარვეზის გამო სრულფასოვნად ვერ მივიღე შეხვედრაში მონაწილეობა, რადგან ჩართვით ვესწრებოდი ამ შეხვედრას, დეტალები არ ვიცი, თუმცა დაახლოებით ინფორმაცია მაქვს თუ რაზე იყო იქ საუბარი. მნიშვნელოვანია საქართველომ გააგრძელოს ის გზა, რომ შევინარჩუნოთ ჩვენი მოკავშირის ევროკავშირის ის დამოკიდებულება, რომელიც ყოველთვის გააჩნდა. ამ დახმარების დაკარგვა ეს არ იქნება პარტიის დახმარების დაკარგვა, ამ თანხას დაკარგავენ მოქალაქეები, რომლებსაც ის ეკუთვნის, ამ თანხას ევროკავშირი უგზავნის სახელმწიფოს და არა რომელიმე პარტიას. თუ საქართველომ ევროკავშირის მაკროფინანსური დახმარება ვერ მიიღო, ამაზე პასუხისმგებელი იქნება ხელისუფლება, რადგან ყოველთვის ყველა დონეზე ევროკავშირის წარმომადგენლები აფრთხილებდნენ “ქართულ ოცნებას”, რომ ეს ფინანსური დახმარება კავშირშია იმ რეფორმებთან, რომელზეც პასუხისმგებლობა აიღეს და უნდა გაატარონ ამ ქვეყანაში, საუბარია სასამართლო რეფორმაზე, საარჩევნო რეფორმაზე, რომელიც დიდწილად განვახორციელეთ, საკონსტიტუციო ცვლილებებზე, პარლამენტს შიგნით ოპოზიციის გაძლიერებაზე და ა.შ.” - განაცხადა იოსელიანმა.