ხელისუფლება ცდილობს დაფაროს 5-6 ივლისს ჩადენილი დანაშაული - სასაცილოა, როგორ ვერ ხვდებიან, ეს მათი კვაზი დიქტატორობა მალე დამთავრდება,- ამის შესახებ ფრაქცია "ლელო - პარტნიორობა საქართველოსთვის" წევრმა შალვა შავგულიძემ განაცხადა, რითაც სახალხო დამცველის განცხადებას გამოეხმაურა.

მისივე თქმით, ხელისუფლება 5-6 ივლისის ორგანიზატორებს იმიტომ არ სჯის, რომ ეს ადამიანები არჩევნებისთვის სჭირდება.

“აბსოლუტურად სწორია სახალხო დამცველის პოზიცია. 5-6 ივლისს არის ძალიან მძიმე დანაშაულები ჩადენილი ამ ხელისუფლების და მისი წაქეზებული მოფაშისტო ელემენტების მიერ. რა თქმა უნდა, ხელისუფლება ცდილობს დაფაროს ეს დანაშაული, რადგან ის ადამიანები სჭირდება არჩევნებზე ძალაუფლების შესანარჩუნებლად. სასაცილოა, როგორ ვერ ხვდებიან, ეს მათი კვაზი დიქტატორობა მალე დამთავრდება და რაც უფრო დროზე შეეცდებიან ამ მდგომარეობიდან გამოვიდნენ, ნაკლებად მტკივნეულად დამთავრდება მათი წარმომადგენლებისთვის,"- განაცხადა შავგულიძემ.

ცნობისთვის, სახალხო დამცველი 5 ივლისს ჯგუფური ძალადობის ორგანიზებისა და ძალადობისკენ მოწოდების ფაქტებზე ზურაბ მახარაძისა და მღვდლის, სპირიდონ ცქიფურიშვილის მიმართ სისხლისსამართლებრივი დევნის დაწყებას მოითხოვს.