მიხეილ სააკაშვილმა უარი თქვა იმ ქვეყნის მოქალაქეობაზე, რომლის ქვეყნის ჯარის მთავარსარდალიც იყო, ამით ყველაფერი ნათქვამია, - ასე ეხმიანება "მოქალაქეების" დეპუტატი ლევან იოსელიანი ჯარისადმი მიხეილ სააკაშვილის მიმართვას.

მისივე თქმით, სააკაშვილი ცდილობს ყველაფერი საკუთარი პოლიტიკური ინტერესებისთვის გამოიყენოს.

"საერთოდ, აქვს თუ არა უფლება, ჯარს მიმართოს, ეს ძალიან დიდი კითხვის ნიშნის ქვეშ დგას მას შემდეგ, რაც საქართველოს მოქალაქეობაზე თქვა უარი. სააკაშვილისთვის არ არსებობს ფაქტორი, რომელსაც ის საკუთარი პოლიტიკური ინტერესების მისაღწევად არ გამოიყენებს. მისთვის ყველანაირი მოცემულობა მისაღებია და ის ამ თვალსაზრისით კლასიკური მაკიაველისტია", - განაცხადა იოსელიანმა.

ცნობისთვის, საქართველოს მესამე პრეზიდენტი მიხეილ სააკაშვილი საქართველოს შეიარაღებული ძალების ოფიცრებსა და სამხედრო მოსამსახურეებს მიმართავს. როგორც ის სოციალურ ქსელში გავრცელებულ ვიდეომიმართვაში აღნიშნავს, ივანიშვილს სჭირდება განადგურებული, „ფარჩაკი", სუსტი საქართველო და არაფერში არ სჭირდება ჯარის არსებობა.