ჩემთვის პირადად ნარკოტესტის გაკეთების ამ უწყინარ ისტორიაში ყველაზე სამწუხარო არის ის, რომ ადამიანი, რომელიც ამ ქვეყნის შს მინისტრი და პრემიერ-მინისტრი იყო ცდილობს ძირი გამოუთხაროს ექსპერტიზის ბიუროს მიმართ ნდობას, - ამის შესახებ „ქართული ოცნების“ წევრმა შალვა პაპუაშვილმა ჟურნალისტებს განუცხადა.
მისივე თქმით, ამ თემაზე გაკეთებული სხვა განცხადებები მნიშვნელოვანი აღარაა.
„მთლიან ისტორიაში, რომელიც ერთი უწყინარი ინიციატივით დაიწყო და რომელიც ჯანსაღი ცხოვრების წესის გაძლიერებასა და წახალისებას შეეხებოდა, სამწუხარო რეალობამდე მივედით. ყველაზე სამწუხარო ჩემთვის პირადად ამ ყველაფერში არის ის, რომ გიორგი გახარია, ადამიანი, რომელიც ამ ქვეყნის შს მინისტრი იყო, რომელიც იყო პრემიერ-მინისტრი, უნდობლობა გამოუცხადა ამ ქვეყნის დამოუკიდებელ საექსპერტო დაწესებულებას, სამხარაულის სახელობის ექსპერტიზის ეროვნულ ბიუროს. მან ყველაზე კარგად იცის როგორც შს მინისტრმა და პრემიერ-მინისტრმა, რა ნიშნავს ეს ბიურო, რა როლი აქვს ამ ბიუროს, მათ შორის ამ ქვეყანაში გამოძიების წარმოებისთვის, რამდენად მნიშვნელოვანია ამ ინსტიტუტის მიმართ ნდობა და რამდენად არასახელმწიფოებრივია, როცა ის ცდილობს ძირი გამოუთხაროს ამ ინსტიტუტის მიმართ ნდობას. დანარჩენი მნიშვნელოვანიც აღარაა“, - განაცხადა პაპუაშვილმა.
ცნობისთვის, პარტია „საქართველოსთვის“ ლიდერმა გიორგი გახარიამ ნარკოტესტი ქვეყნის ფარგლებს გარეთ, ავსტრიაში ჩაიტარა. მისი თქმით, საქართველოში, ექსპერტიზის ეროვნულ ბიუროში მის მიმართ გარკვეული პროვოკაცია მზადდებოდა.