ორმაგი მოქალაქეობის შესახებ რუსეთთან შეთანხმებას, რომელიც ოკუპირებული აფხაზეთის „მოქალაქეებისთვის“ რუსეთის მოქალაქეობის გამარტივებული წესით მინიჭებას ითვალისწინებს, ხელი უახლოეს ხანში მოეწერება.

„სპუტნიკის“ ინფორმაციით, ამის შესახებ ოკუპირებული აფხაზეთის დე ფაქტო პრეზიდენტმა ასლან ბჟანიამ ჟურნალისტებს განუცხადა.

„წელს მიღწეულია შეთანხმება საერთაშორისო შეთანხმებაზე ხელმოწერის შესახებ, რომელიც იქნება საფუძველი აფხაზეთის მოქალაქეებისთვის რუსეთის მოქალაქეობა მიიღონ. ის ასევე განსაზღვრავს პირთა სამართლებრივ სტატუსს, ვისაც ორმაგი მოქალაქეობა გააჩნია. შეთანხმება მზად არის. ის შეთანხმებულია რუსეთისა და აფხაზეთის მხარეებს შორის და მას ხელი უახლოეს ხანში მოეწერება“ , - განაცხადა ბჟანიამ.

ბჟანიას კონკრეტული თარიღი არ დაუსახელებია.