თუ პოლიტიკური დიალოგი უნდათ, ამისთვის პარლამენტი არსებობს - თუ ფიქრობენ, რომ პოტსდამის კონფერენცია უნდა მოვიწვიოთ, არ მგონია, ეს სერიოზული იყოს, - აღნიშნული კომენტარით “ქართული ოცნების“ წარმომადგენელი სოზარ სუბარი “ლელოს“ ლიდერის მამუკა ხაზარაძის მოწოდებას გამოეხმაურა.
სუბარის განაცხადებით, პოლიტიკური დიალოგისთვის ყველაზე კარგი მოედანი პარლამენტის სხდომათა დარბაზია, პარლამენტი მუშაობს და ოპოზიციას შეუძლია სხდომებში მიიღოს მონაწილეობა.
“პოლარიზაციის დაძლევის და კონსტრუციულ რეჟიმში გადასვლის გზა არის საპარლამენტო მუშაობა და არა პარლამენტისთვის ბოიკოტის გამოცხადება და სახელმწიფო დაწესებულებების წინ აქციების მოწყობა. ოპოზიცია ცდილობს, რომ ფეთქებადსაშიში ვითარება შექმნას, ამას ვერ “წევენ“ და შემდეგ რაღაც წინადადებებს აყენებენ“, - განუცხადა ჟურნალისტებს სოზარ სუბარმა.
პარტია „ლელო“ ხელისუფლებას მოუწოდებს, ქვეყანაში არსებული კრიზისიდან გამოსასვლელად, სასწრაფოდ დაიწყოს ხელისუფლებასა და ოპოზიციას შორის მოლაპარაკებები.