ოკუპირებული სამხრეთ ოსეთის ე.წ. პრეზიდენტმა ანატოლი ბიბილოვმა ხელი მოაწერა განკარგულებას საქართველოს 53 წლის მოქალაქის გენადი ბესტაევის შეწყალების შესახებ. ინფორმაციას მედია ე.წ. უშიშროების კომიტეტზე დაყრდნობით ავრცელებს.
როგორც ინფორმაციაშია ნათქვამი, ბესტაევი 2019 წლის ნოემბერში ე.წ. რესპუბლიკის "სახელმწიფო საზღვრის" უკანონო გადაკვეთისა და ნარკოტიკების კონტრაბანდის ბრალდებით დააკავეს და შემდეგ სამი წლითა და ორი თვით თავისუფლების აღკვეთა მიუსაჯეს. მათივე ცნობით, შეწყალების გადაწყვეტილება მისი ავადმყოფობის გამო იქნა მიღებული.
შეგახსენებთ, საქართველოს სახელმწიფო უსაფრთხოების სამსახურის ინფორმაციით, უკანონოდ დაკავებული გენადი ბესტაევი უკვე ცენტრალური ხელისუფლების მიერ კონტროლირებად ტერიტორიაზე იმყოფება.