ევროპის ეროვნული საფოსტო ოპერატორების გაერთიანებამ “Post Europ” - მა თავის ოფიციალურ ვებ - და სოციალურ გვერდებზე ქართული მარკის შესახებ გაავრცელა ინფორმაცია, რომელზეც გადაშენების პირას მყოფი საკმლის ხე, ქურციკი და ბექობის არწივია გამოსახული. ამის შესახებ ინფორმაციას საქართველოს ფოსტა ავრცელებს.

მათივე ცნობით, აღნიშნული მარკა „Europa 2021“ შექმნილია "Post Europ" - ის ეგიდით და მიზნად ისახავს საზოგადოების ყურადღების მიპყრობას გლობალური დათბობისა და კლიმატის ცვლილებასთან დაკავშირებულ გამოწვევებისადმი.

როგორც საქართველოს ფოსტაში განმარტავენ, აღნიშნული მარკა საქართველოში 2021 წლის ოქტომბრიდან არის მიმოქცევაში, საქართველოს ფოსტის 81 სერვისცენტრში, საქართველოს მასშტაბით.

„ “Post Europ” - ის მეშვეობით კი მის შესახებ ინფორმაცია ევროპის მასშტაბით გავრცელდა. აღნიშნულით, გაიზრდება იმ აუდიტორიის რაოდენობა, რომლებიც მიიღებენ ინფორმაციას საქართველოში არსებული ფლორისა და ფაუნის უნიკალური წარმომადგენლების შესახებ“, - აღნიშნულია ინფორმაციაში, რომელსაც საქართველოს ფოსტა ავრცელებს.

"Post Europ" - ის აქციას 2012 წლიდან ახორციელებს.