მიხეილ ჩხენკელმა ხელნაწერთა ეროვნულ ცენტრში გალაკტიონ ტაბიძის აქამდე უცნობი ხელნაწერების გამოფენა გახსნა

გალაკტიონ ტაბიძის 130 წლის იუბილეს აღსანიშნავად კორნელი კეკელიძის სახელობის საქართველოს ხელნაწერთა ეროვნულ ცენტრში პოეტის აქამდე უცნობი ხელნაწერები გამოიფინა – პოეტის პირადი წერილები, გამოუქვეყნებელი ლექსები: „ძველი კოშკი“, „მელოდია“, „წამების ჯვარი“ „წერილი დედას“, გიორგი ქუჩიშვილის უცნობი წერილი გალაკტიონისადმი, პოემა „ფერფლი“, რომლის მხოლოდ სახეცვლილი ვარიანტის ნაწილია გამოქვეყნებული, პოეტის ესკიზები და სხვა.

აღნიშნულის შესახებ „ინტერპრესნიუსს“ განათლების სამინისტროდან აცნობეს. როგორც მათ ინფორმაციაშია აღნიშნული, საქართველოს განათლებისა და მეცნიერების მინისტრი მიხეილ ჩხენკელი ხელნაწერთა ეროვნულ ცენტრს ეწვია, გალაკტიონ ტაბიძის აქამდე უცნობი ხელნაწერების გამოფენა გახსნა და საზოგადოებას პოეტის 130 წლის იუბილე მიულოცა. „ჩემთვის ყოველთვის დიდი პატივია თქვენთან სტუმრობა – უნიკალურ ცენტრში, სადაც ჩვენი ქვეყნის საგანძური – ხელნაწერთა უმდიდრესი კოლექციაა დაცული, რომელიც საქართველოს ინტელექტუალურ და კულტურულ მემკვიდრეობას და უდიდეს ისტორიას ინახავს.

„ვულოცავ ხელნაწერთა ეროვნულ ცენტრს, მის თითოეულ თანამშრომელს და მთელ საზოგადოებას, რომ გალაკტიონ ტაბიძის 130 წლის იუბილეს არაჩვეულებრივი გამოფენით შეხვდა.

მიხარია, რომ ეს უნიკალური არქივი, რომელშიც წარმოდგენილია გამოუქვეყნებელი პოემა, ლექსები, პირადი წერილები, პოეტის საინტერესო ესკიზები, დაცული იქნება ხელნაწერთა ეროვნულ ცენტრში. დარწმუნებული ვარ, მისი მეცნიერული თვალსაზრისით შესწავლის შემდეგ საინტერესო პუბლიკაციები გამოიცემა.

კიდევ ერთხელ გილოცავთ და გამოვხატავ პატივისცემას – ხელნაწერთა ეროვნული ცენტრის თითოეული თანამშრომელი მართლაც უაღრესად მნიშვნელოვან, საშვილიშვილო საქმეს ემსახურებით“, - განაცხადა ჩხენკელმა.

გალაკტიონ ტაბიძის არქივის ნაწილი, 62 ერთეული, ხელნაწერთა ეროვნულმა ცენტრმა კერძო პირისგან შეისყიდა. თანხის ნაწილი მოხმარდება ჭყვიშში გალაკტიონის სახელთან დაკავშირებული მემორიალური ადგილების განვითარებას.

მნიშვნელოვანია, რომ გამოუცემელი ხელნაწერები დიდ სიახლეს წარმოადგენს გალაკტიონის შემოქმედებით დაინტერესებული მკვლევრებისთვის.

გალაკტიონის აქამდე უცნობი ხელნაწერების ხილვის შესაძლებლობა დამთვალიერებელს წლის ბოლომდე ხელნაწერთა ცენტრის საგამოფენო დარბაზში ექნება.

ხათუნა ბურკაძე - კრემლის აგრესიული პოლიტიკის ფონზე აუცილებელია აშშ-საქართველოს სტრატეგიული პარტნიორობის ქარტიის განახლება
ქართული პრესის მიმოხილვა 06.12.2021
პაატა დავითაია - საკონსტიტუციო ცვლილებებთან დაკავშირებით „ქართული ოცნების“ და „ნაციონალური მოძრაობის“ ინტერესები ემთხვევა - ბარიერის დაწევა აუცილებელია ქართული დემოკრატიის განვითარებისთვის
Colliers MMS გაფართოებული საინვესტიციო პორტფელი და ახალი შეთავაზება სამშენებლო სექტორს
სამშენებლო კომპანია „მეგა ჰოლდინგი“ მეგა საახალწლო აქციას აანონსებს: ყველა ბინა საჩუქრით
შეიძინე ბინა წინასწარი შენატანის გარეშე - შეთავაზება „ტერასა გლდანი გრინ თაუერისგან“