რამდენადაც ვიცი, მისი ჯანმრთელობის მდგომარეობა გაუმჯობესებულია. ალბათ, რამდენიმე კვირა გაგრძელდება მკურნალობა და დანარჩენი უნდა გადაწყდეს პაციენტის მდგომარეობის მიხედვით, - ამის შესახებ სახალხო დამცველის მიერ შექმნილი ექსპერტ-მედიკოსთა ჯგუფის წევრმა თენგიზ წულაძემ გორის სამხედრო ჰოსპიტალთან, მესამე პრეზიდენტი მიხეილ სააკაშვილის მონახულებამდე განაცხადა.

წულაძის განმარტებით, ომბუდსმენის ეგიდით შექმნილი ჯგუფის წევრები გაეცნობიან სააკაშვილის ჯანმრთელობის მდგომარეობას, ასევე ჩატარებული კვლევის შედეგებს და მის მკურნალ ექიმებს პირადად გაესაუბრებიან.

"უნდა შევაფასოთ როგორ მიმდინარეობს მკურნალობა და რა კვლევებიც ჩატარებულია. თუ სტაბილურია მდგომარეობა, ჩვენ ვიტყვით ამის შესახებ და ამას მისი მკურნალი ექიმებიც მოგახსენებენ. სერიოზული მკურნალობა მიმდინარეობს და რამდენად ხანგრძლივი იქნება, ამის თქმა ძალიან რთულია. ჩვენი მანდატიც ეს არის, რომ საქმეში ჩართულები ვიყოთ, ჩვენ პირდაპირ მკურნალობაში ჩართულები არ ვართ”, - აღნიშნა თენგიზ წულაძემ.