გლდანის ციხეში პატიმარი გარდაიცვალა. გარდაცვლილი პატიმრის ეგორ გრეგენკოს ადვოკატის ჯაბა კოჭლამაზაშვილის განცხადებით, მას ციხის ადმინისტრაცია სასჯელაღსრულების დაწესებულებაში არ უშვებს და პატიმრის ცხედრის დათვალიერების პროცედურაზე არ ასწრებს.

როგორც ადვოკატმა „ტვ პირველს“ განუცხადა, პატიმრის გარდაცვალების შესახებ მას სახელმწიფო დაცვის ინსპექტორის სამსახურიდან აცნობეს.

„ციხის ადმინისტრაცია მე არაფერს მეუბნება, უბრალოდ, არ მიშვენებენ. მე დღეს მოვედი აქ ციხეში, ვნახე სულ სხვა პატიმარი. იქიდან გამოსულს მირეკავს სახელმწიფო დაცვის ინსპექტორის სამსახური და მეუბნება, რომ თქვენი დაცვის ქვეშ მყოფი გარდაიცვალა, პროზექტურიდან ვინ წაიყვანსო?! მე კატეგორიულად ვითხოვე ჩემთვის მოეცათ ნება, რომ შევსულიყავი და დათვალიერებას დავსწრებოდი, ახლა მიმდინარეობს ცხედრის დათვალიერება. დიდი ჩხუბის შემდეგ, რომ ავუხსენი, რომ მაქვს ამის უფლება, მითხრა, რომ თუ შემოხვალ, მე დაგასწრებო. ორდერი მაქვს და არ მიშვებენ შიგნით, რაღაც შინაგანაწესიაო. იქ არის გარდაცვლილი, მე ვყავარ მარტო ამ პატიმარს, ადვოკატი, მეტი არავინ ჰყავს და არ მიშვებენ, რომ დავესწრო, ვნახო რა მდგომარეობაშია ახლა. ბოლოს, როცა მე ვნახე ეგორი, მან მითხრა, რომ თუ არის შესაძლებელი სამარტოო საკანში გადასვლა. მე არ ვიცი, ეს რის გამო მთხოვა, მაგრამ ვუთხარი, რომ როგორც კი განაჩენს გამოაგზავნიდა სასამართლო, მას გადაიყვანდნენ ჩვეულებრივ ციხეში და სავარაუდოდ, მე-17 დაწესებულებაში, ჩვეულებრივ საკანში. არ ვიცი რა მოხდა, ვითხოვ დასწრებას დათვალიერებაზე“, - განაცხადა ადვოკატმა.