ოკუპირებულ აფხაზეთს ე.წ. შინაგან საქმეთა ახალი მინისტრი ჰყავს. ამ თანამდებობაზე დე ფაქტო პრეზიდენტმა ასლან ბჟანიამ დღევანდელი „ბრძანებით“ვალტერ ბუთბა დანიშნა. ამის შესახებ ინფორმაციას ადგილობრივი მედია პრესსამსახურზე დაყრდნობით ავრცელებს.

2 დეკემბერს ცნობილი გახდა, რომ დიმიტრი დბარი ე.წ. შინაგან საქმეთა მინისტრის თანამდებობიდან გათავისუფლდა და დე ფაქტო რესპუბლიკის „სახელმწიფო დაცვის სამსახურის“ ხელმძღვანელად დაინიშნა.

ცნობისთვის, ოქტომბრის დასაწყისში ოპოზიციამ ოკუპირებულ აფხაზეთში მიტინგი გამართა, რომელზეც ასლან ბჟანიას გადადგომა მოითხოვა. ამის მიზეზი ის ფაქტი გახდა, რომ დე ფაქტო პრეზიდენტმა არ დააკმაყოფილა ოპოზიციის მოთხოვნა, გაეთავისუფლებინა თანამდებობიდან დიმიტრი დბარი სოხუმში მომხდარი სროლის გამო, რომელშიც ე.წ. ოპოზიციონერი დეპუტატები გარი კოკაია და ალმასხან არძინბა მონაწილეობდნენ. ბჟანიამ დბარს მხოლოდ საყვედური გამოუცხადა.