მიხეილ ყაველაშვილი - ყოფილმა პრეზიდენტმა უნდა აღიაროს დანაშაულები, საზოგადოებას უნდა შეურიგდეს, გამწარებულ ადამიანებს - თუ ამას არ გააკეთებს, მაშინ წარმოუდგენელია შერიგება
ჯერ ყოფილმა პრეზიდენტმა უნდა აღიაროს დანაშაულები, რომელიც მისი მმართველობის დროს განხორციელდა, საზოგადოებას უნდა შეურიგდეს, გამწარებულ ადამიანებს - თუ ამას არ გააკეთებს, მაშინ წარმოუდგენელია შერიგება, - ასე ეხმიანება საპარლამენტო უმრავლესობის წევრი მიხეილ ყაველაშვილი ჟურნალისტებთან ყოფილ და მოქმედ პრეზიდენტთან შეხვედრის თაობაზე და ეროვნულ შერიგებაზე მესამე პრეზიდენტის, მიხეილ სააკაშვილის ინიციატივას.
ამასთან, ის გამოეხმაურა პრეზიდენტის ინიციატივასაც პოლარიზაციის შემცირებაზე და აღნიშნა, რომ ის მიხეილ სააკაშვილთან შერიგებას არ გულისხმობდა.
"ჯერ ყოფილმა პრეზიდენტმა უნდა აღიაროს დანაშაულები, რომელიც მისი მმართველობის დროს განხორციელდა, საზოგადოებას უნდა შეურიგდეს, იმ გამწარებულ ადამიანებს, თუ ამას არ გააკეთებს, მაშინ წარმოუდგენელია შერიგება. როცა არჩევნებს არ აღიარებ, ქუჩაში გამოდიხარ, რევოლუციისკენ მოუწოდებ, ამბობ, რომ "ქართული ოცნება" რუსეთის პროექტია და ა.შ. როგორ გგონიათ ასეთი დამოკიდებულებით, რასაც აკეთებენ, შერიგებას რას ეძახიან? რუსეთის გუბერნია თუ არის და რუსეთისკენ მიჰყავს "ქართულ ოცნებას", როგორ უნდა შეურიგდეს? რიტორიკა უნდა შეცვალოს და პირველი რაც უნდა გააკეთოს, აღიაროს დანაშაულები, რაც ჩაიდინა,"- განაცხადა ყაველაშვილმა.
ჟურნალისტებმა მას ჰკითხეს ასევე მეუფე იაკობის განცხადების თაობაზე, რომელიც მიიჩნევს, რომ შერიგება ეკლესიაში უნდა მოხდეს და თუ არის მზად "ქართული ოცნება" მიიღოს ამაში მონაწილეობა, ყაველაშვილმა უპასუხა: "ეკლესიაში რატომ უნდა მიიღოს მონაწილეობა "ქართულმა ოცნებამ"?
