რეგიონული განვითარების და ინფრასტრუქტურის მინისტრის მოადგილემ მზია გიორგობიანმა, გაეროს განვითარების პროგრამის მენეჯერ თინათინ ტყეშელაშვილთან ერთად, UNDP-ის პროექტის - ,,რეგიონული და ადგილობრივი განვითარების ხელშეწყობა საქართველოში" ფარგლებში, სამეგრელო-ზემო სვანეთის სახელმწიფო რწმუნებულს გიორგი გუგუჩიას 63 პერსონალური კომპიუტერი, 43 პორტატული სკანერი და 18 მულტიფუნქციური პრინტერი გადასცა.
ტექნიკა რეგიონის ცხრავე მუნიციპალიტეტზე გადანაწილდება. პროექტი შვეიცარიის განვითარებისა და თანამშრომლობის სააგენტოს, ავსტრიის განვითარების სააგენტოსა და საქართველოს რეგიონული განვითარების და ინფრასტრუქტურის სამინისტროს ფინანსური მხარდაჭერით ხორციელდება.
„ტექნიკის ნაწილს მუნიციპალიტეტის მერიები, კერძოდ: პორტატულ სკანერებსა და პერსონალურ კომპიუტერებს ადმინისტრაციულ ერთეულებში მერიის წარმომადგენლებს გადასცემენ. ტექნიკური აღჭურვილობა დაეხმარება მუნიციპალიტეტებს დისტანციური სერსვისის დანერგვასა და განვითარებაში. ადგილობრივ მოსახლეობას მიეცემა შესაძლებლობა, ელექტრონულად მიმართონ სასურველ ორგანოს და მიიღონ საჭირო ინფორმაცია”,- აღნიშნულია გავრცელებულ ინფორმაციაში.