იურიდიულ საკითხთა კომიტეტის თავმჯდომარის ანრი ოხანაშვილის განცხადებით, იუსტიციის უმაღლესი საბჭოს არამოსამართლე წევრების არჩევის პროცესი ოპოზიციის მხრიდან არასაკმარისი დაინტერესების გამო არ იწყება.
როგორც ოხანაშვილმა კომიტეტის სხდომაზე განაცხადა, „ქართულ ოცნებას“ არ აქვს იმდენი ხმა, რომ მხოლოდ მან აირჩიოს იუსტიციის უმაღლეს საბჭოში წევრები.
„რომელიმე ოპოზიციონერი კოლეგისგან ამ საკითხზე პოზიცია მოისმინეთ? ჩვენ რომც დავიწყოთ ამ პროცესის ინიცირება, ჩვენ ხომ ვერ მივიღებთ ამ გადაწეყვეტილებას, ხომ კარგად იცით? 90 ხმა ხომ გვჭირდება? ის პროცესი როცა დასრულდა გავიდა ბევრი თვე. ამ საკითხის ინიცირება როცა მოხდება, „ქართულ ოცნებას“ არ აქვს იმდენი ხმა, რომ მხოლოდ მან აირჩიოს იუსტიციის უმაღლეს საბჭოში წევრები, ამას სჭირდება ოპოზიციის ჩართულობა. რომელიმე ოპოზიციონერი კოლეგისგან ამ საკითხით დაინტერესება მოისმინეთ, ასეა მთელი ეს პროცესი. ხმები არ გვაქვს რომ დავიწყოთ. არ აქვს ოპოზიციას ინტერესი, არ მომისმენია მათგან დაინტერესება“,- განაცხადა ანრი ოხანაშვილმა.