ჯანდაცვის სამინისტროსთან სანატორიუმ „ქართლში“ შესახლებული დევნილების საპროტესტო აქცია დასრულდა.

როგორც დევნილებმა მედიის წარმომადგენლებს განუცხადეს, ამაღამ პროტესტს სანატორიუმ „ქართლთან“ გააგრძელებენ, ხვალიდან კი სხვადასხვა სახელმწიფო დაწესებულებებთან გადაინაცვლებენ.

„არ დარჩება საქართველოში სტრუქტურა და სამინისტრო, რომელთანაც ფეხით არ მივალთ. არ ვიცით ხვალ რა გველოდება და ღამეს სად გავათენებთ. დღეს დავიშლებით, აქ დგომას აზრი არ აქვს, პროტესტს სანატორიუმ „ქართლთან“ გავაგრძელებთ. ხვალ შესაძლებელია აქცია მთავრობის ადმინისტრაციასთანაც გავმართოთ, ასევე პრეზიდენტის სასახლესთან. ვეცდებით ჩვენი ხმა ყველას მივაწვდინოთ“, - განაცხადა აქციის მონაწილე დიანა დავლიანიძემ.

ცნობისთვის, ჯანდაცვის სამინისტროსთან დევნილები თემქიდან მსვლელობით მივიდნენ. ისინი ჯანდაცვის მინისტრთან პირადად შეხვედრას ითხოვდნენ. დევნილები პროტესტის გაგრძელებას და შიმშილობას აანონსებენ. მათივე ინფორმაციით, დღეს, აქციის გამართვამდე, ჯანდაცვის სამინისტროში შეხვედრაზე იმყოფებოდნენ, სადაც მათი პრობლემა უნდა გადაჭრილიყო, თუმცა, სამინისტრო მხოლოდ ქირით გადასვლას სთავაზობს. დევნილებისთვის უცნობია დაფარავს თუ არა სახელმწიფო ქირის საფასურს.