საქართველოში 2020-2021 წლებში კორონავირუსით გარდაცვლილთა 52% ქალია, 48% კი მამაკაცი. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის 2020-2021 წლის ანგარიშშია აღნიშნული.

რაც შეეხება გარდაცვლილთა ასაკობრივ განაწილებას, სიკვდილიანობის მაჩვენებლიდან ყველაზე მეტი, 31.7%, 80 წელზე მეტი ასაკის პირებზე მოდის, 0-9 წლამდე ასაკის ბავშვებში კი ეს მაჩვენებელი 0.1%-ია.

სხვა ასაკობრივ კატეგორიებში სიკვდილიანობის პროცენტული გადანაწილება ასეთია: 80 წელზე მეტი - 31.7%; 70-79 წელი - 29.3%; 60-69 წელი - 24.8%; 50-59 წელი - 10%; 40-49 წელი - 2.9%; 30-39 წელი - 1%; 20-29 წელი - 0.3%; 10-19 წელი – 0.1%; 0-9 - 0.1%.

ამასთან, გარდაცვალების ყველაზე მაღალი დღიური რაოდენობა 2021 წლის ნოემბერში დაფიქსირდა და 68.2% შეადგინა.

ანგარიშში ასევე საუბარია გარდაცვლილთა თანმხლებ დაავადებებზე და ნათქვამია, რომ გარდაცვლილ პაციენტთა 50.2%-ს აღენიშნებოდა სხვადასხვა თანმხლები ქრონიკული დაავადება, მათ შორის 57%-ს კარდიოვასკულური დაავადებები და ჰიპერტენზია, დიაბეტი – 25.9%-ს, ხოლო ონკოლოგიური დაავადება – 5.6%–ს.

ანგარიშის თანახმად, ყველა ლეტალურ შემთხვევაში დაავადების მიმდინარეობა იყო მძიმე ან კრიტიკული და შემთხვევათა 81.1%-ში დაავადება გართულებული იყო პნევმონიით. გარდაცვლილთა 79.7%-ს სუნთქვის უკმარისობა აღენიშნებოდა; რესპირაციული დისტრეს სინდრომი აღენიშნა გარდაცვლილ პაციენტთა 29.1%-ს, ხოლო 20.7%-ში განვითარდა გულის უკმარისობა.