ჩინეთის დედაქალაქი პეკინი 4-20 თებერვალს ზამთრის XXIV ოლიმპიურ თამაშებს მასპინძლობს. საქართველოდან სპორტის 3 სახეობაში (ფიგურული ციგურაობა, სამთო თხილამურობა, ციგაობა) 9 სპორტსმენი ასპარეზობს.

ზამთრის ოლიმპიადის გახსნის ცერემონია პეკინის „ეროვნულ სტადიონზე“ თბილისის დროით 16:00 საათზე დაიწყება.

ოლიმპიადის თილისმად შეარჩიეს გიგანტური პანდა, ბინ დუნ დუნი, რომელსაც ყინულის „კოსტიუმი“ აცვია. ოლიმპიადაზე 95 ქვეყნის 4 000-მდე სპორტსმენი იასპარეზებს სპორტის 15 დისციპლინაში, მათ შორის : ბიატლონში, ყინულის ჰოკეიში, ციგურებით სრიალში, სათხილამურო სპორტში, სნოუბორდში, ფიგურულ სრიალში.

პეკინში ოლიმპიურ თამაშებზე საქართველოს ოლიმპიურ დელეგაციას სეოკ-ის პრეზიდენტი ლერი ხაბელოვი ხელმძღვანელობს.

ოლიმპიურ თამაშებზე საქართველოს ოლიმპიური დელეგაციის მედროშეები არიან მოთხილამურე ნინო წიკლაური და მოციგურავე მორის ყვითელაშვილი.

2022 წლის პეკინის ზამთრის ოლიმპიური თამაშების ლიცენზიანტი სპორტსმენები:

1. მორის ყვითელაშვილი - ფიგურული ციგურაობა, ერთეულთა სრიალი (კაცები).
2. ანასტასია გუბანოვა - ფიგურული ციგურაობა, ერთეულთა სრიალი (ქალები).
3. მარია კაზაკოვა/გიორგი რევია - ფიგურული ციგურაობა, ყინულზე ცეკვა (შერეული წყვილები).
4. კარინა საფინა/ლუკა ბერულავა - ფიგურული ციგურაობა, სპორტული სრიალი (შერეული წყვილები).
5. ნინო წიკლაური - სამთო თხილამურობა.
6. სოსო ჯაფარიძე - სამთო თხილამურობა.
7. საბა ქუმარიტაშვილი - ციგაობა.

ზამთრის XXIV ოლიმპიური თამაშების პირდაპირ ტრანსლაციას უზრუნველყოფს საქართველოს პირველი არხი.