ჩვენ ვცდილობთ გამოვიდეთ არა აღქმებიდან, არამედ ფაქტებიდან, რეალობიდან და ობიექტურობიდან - ყველა შეუთანხმებლობის მიზეზი იყო ის, რომ არასდროს შეგვიქმნია დოკუმენტი, თუ რა ხდებოდა სასამართლო სისტემის რეფორმებთან დაკავშირებით, - ამის შესახებ ფრაქცია “ქართული ოცნების“ თავმჯდომარემ მამუკა მდინარაძემ განაცხადა.

როგორც მდინარაძემ საპარლამენტო ოპოზიციის წარმომადგენლებთან კონსულტაციების შემდეგ განმარტა, გადაწყდა, რომ ერთი თვის ვადაში წარმოდგენილი იქნება შეფასებისა და ანალიზის დოკუმენტი, რომელიც სასამართლო სისტემის რეფორმის ოთხივე ტალღას შეეხება.

“ჩვენ რა თქმა უნდა, ჩვენს ვერსიას გავაკეთებთ. არ გამოვრიცხავ, იყოს საკითხები, რაზეც შევჯერდებით როგორც მიღწევებთან, გაკეთებულ საქმეებთან დაკავშირებით, ასევე გამოწვევებთან მიმართებაში. ბუნებრივია, თუ ასეთ საკითხებზე შევთანხმდით, ცვლილებებს დავაინიცირებთ და ეს კარგი იქნება. რაზეც ვერ შევჯერდებით, ამაზე დისკუსიას გავაგრძელებთ“, - განაცხადა ფრაქცია “ქართული ოცნების“ თავმჯდომარემ.