2021 წელს გენერალურმა პროკურატურამ სახელმწიფო ინსპექტორის სამსახურის საგამოძიებო დეპარტამენტის წარმოებაში არსებულ ხუთ სისხლის სამართლის საქმეზე, სისხლისსამართლებრივი დევნა შინაგან საქმეთა სამინისტროს 4 თანამშრომლისა და სპეციალური პენიტენციური სამსახურის 2 თანამშრომლის მიმართ დაიწყო. ამის შესახებ „ინტერპრესნიუსს“ სახელმწიფო ინსპექტორის სამსახურიდან საჯარო ინფორმაციის მოთხოვნის საპასუხოდ აცნობეს.

მათი ინფორმაციით, გასულ წელს, შსს-ს 4 პირის მიმართ სისხლისსამართლებრივი დევნა 333-ე მუხლით დაიწყო, რაც სამსახურებრივი უფლებამოსილების გადამეტებას გულისხმობს. ორი პირის შემთხვევაში პროკურორმა სისხლისსამართლებრივი დევნის დაწყების შემდგომ ბრალი დააზუსტა და მათ სამსახურეობრივი უფლებამოსილების გადამეტებასთან ერთად ბრალი 144³ მუხლითაც წარედგინათ, რაც დამამცირებელ ან არაადამიანურ მოპყრობას გულისხმობს.

რაც შეეხება პენიტენციური სამსახურის ორ თანამშრომელს - უწყების ცნობით, პროკურატურამ მათ მიმართ სისხლისსამართლებრივი დევნა სახელმწიფო ინსპექტორის სამსახურის საგამოძიებო ქვემდებარეობას მიკუთვნებული სისხლის სამართლის კოდექსის სხვა მუხლებით დაიწყო.

უწყების მიერ მოწოდებულ ინფორმაციაში აღნიშნულია, რომ ბოლო ორი წლის განმავლობაში (2019 წლის 1-ლი ნოემბრიდან 2021 წლის 31 დეკემბრის ჩათვლით) პროკურატურამ სახელმწიფო ინსპექტორის სამსახურის საგამოძიებო დეპარტამენტის წარმოებაში არსებულ 11 სისხლის სამართლის საქმეზე სისხლისსამართლებრივი დევნა სულ 12 პირის მიმართ დაიწყო. აღნიშნული 12 პირიდან 10 შინაგან საქმეთა სამინისტროს თანამშრომელი, ხოლო 2 სპეციალური პენიტენციური სამსახურის თანამშრომელი იყო.

„სისხლის სამართლის კოდექსის 333-ე და 144³ მუხლებით სისხლისსამართლებრივი დევნა გენერალურმა პროკურატურამ შინაგან საქმეთა სამინისტროს 8 თანამშრომლის მიმართ დაიწყო, ხოლო სხვა პირების მიმართ სისხლისსამართლებრივი დევნა სახელმწიფო ინსპექტორის სამსახურის საგამოძიებო ქვემდებარეობას მიკუთვნებული სისხლის სამართლის კოდექსის სხვა მუხლებით დაიწყო.

შინაგან საქმეთა სამინისტროს ზემოაღნიშნული 8 თანამშრომლიდან:

5 პირი ბრალდებულად იქნა ცნობილი სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით), აღნიშნული 5 პირიდან პროკურორმა ერთი პირის მიმართ სისხლისსამართლებრივი დევნის დაწყების შემდეგ ბრალი დააზუსტა და სისხლისსამართლებრივი დევნა სისხლის სამართლის კოდექსის 333-ე მუხლის მე-3 ნაწილის „ბ“ და „გ“ ქვეპუნქტებით გაგრძელდა (სამსახურებრივი უფლებამოსილების გადამეტება, ჩადენილი ძალადობითა და პირადი ღირსების შეურაცხყოფით);

1 პირი დაკავებულ იქნა და ბრალი წარედგინა სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით (სამსახურებრივი უფლებამოსილების გადამეტება იარაღის გამოყენებით);

1 პირი დაკავებულ იქნა და ბრალი წარედგინა სისხლის სამართლის კოდექსის 333-ე მუხლის მე-3 ნაწილის „გ“ ქვეპუნქტით (სამსახურებრივი უფლებამოსილების გადამეტება, ჩადენილი პირადი ღირსების შეურაცხყოფით - სამი ეპიზოდი). აღნიშნული პირის მიმართ პროკურორმა სისხლისსამართლებრივი დევნის დაწყების შემდგომ, ბრალი დააზუსტა და სისხლისსამართლებრივი დევნა სისხლის სამართლის კოდექსის 333-ე მუხლის მე-3 ნაწილის „გ“ ქვეპუნქტით (სამსახურებრივი უფლებამოსილების გადამეტება, ჩადენილი პირადი ღირსების შეურაცხყოფით - 2 ეპიზოდი) და სისხლის სამართლის კოდექსის 144³ მუხლის მე-2 ნაწილის „ა“, „ბ“ და „დ“ ქვეპუნქტებით გაგრძელდა (დამამცირებელი ან არაადამიანური მოპყრობა - 1 ეპიზოდი);

1 პირი დაკავებულ იქნა და ბრალი წარედგინა სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით - 1 ეპიზოდი) და ამავე მუხლის მე-3 ნაწილის „გ“ ქვეპუნქტით (სამსახურებრივი უფლებამოსილების გადამეტება პირადი ღირსების შეურაცხყოფით - 2 ეპიზოდი). აღნიშნული პირის მიმართ პროკურორმა, სისხლისსამართლებრივი დევნის დაწყების შემდგომ, ბრალი დააზუსტა და სისხლისსამართლებრივი დევნა სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით - 1 ეპიზოდი), ამავე მუხლის მე-3 ნაწილის „გ“ ქვეპუნქტით (სამსახურებრივი უფლებამოსილების გადამეტება, ჩადენილი პირადი ღირსების შეურაცხყოფით - 1 ეპიზოდი) და სისხლის სამართლის კოდექსის 144³ მუხლის მე-2 ნაწილის „ა“, „ბ“ და „ე“ ქვეპუნქტებით გაგრძელდა (დამამცირებელი ან არაადამიანური მოპყრობა);" - აღნიშნულია ინფორმაციაში.