ვფიქრობ, „ქართული ოცნებაც“ ხვდება, რომ სასამართლოს ჩაფლავებული რეფორმები იმიჯის თვალსაზრისით ძალიან მძიმე ტვირთია , - ამის შესახებ „ლელოს“ ერთ-ერთმა წევრმა ანა ნაცვლიშვილმა „პალიტრანიუსის“ გადაცემაში „360 გრადუსი“ განაცხადა, როდესაც ქვეყანაში სასამართლო სისტემასთან დაკავშირებით ისაუბრა.

ანა ნაცვლიშვილის თქმით, ყველაზე უფრო მოზომილი კრიტიკის დროსაც კი, რომელიც ქვეყნის შიგნიდან თუ გარედან „ქართული ოცნების“ ხელისუფლების მისამართით ისმის, სასამართლო აუცილებლად არის ნახსენები.

„გასულ წელს საქართველოს მოქალაქეებმა 300 მილიონი დავკარგეთ. გადაწყვეტილი იყო, რომ საქართველოში უნდა წამოსულიყო და მოხმარებოდა ჩვენს მოქალაქეებს, მაგრამ „ქართული ოცნების“ მხრიდან სასამართლო რეფორმის ჩაგდების გამო, აღნიშნული 300 მილიონი საქართველოს მოქალაქეებს მათ დააკარგვინეს. მართალია, პიარის კუთხით ეცადნენ ეთქვათ, თითქოს თვითონ თქვეს უარი 300 მილიონზე, მაგრამ „ტყუილს მოკლე ფეხები აქვს“ და გამოჩნდა. ამ წელს და შემდგომ წლებში 300 მილიონი იქნება ძალიან ცოტა თანხა იმასთან შედარებით, რასაც საქართველო დაკარგავს, თუ სასამართლო დარჩა ამ კონდიციაში“, - განაცხადა ანა ნაცვლიშვილმა.

მის თქმით, „ლელოს“ მიზანია, აჩვენოს, „მათ შორის, პარტნიორებს, რომ მართალია დღეს, ქვეყანაში სასამართლო სისტემა კრიზისშია, მაგრამ მისი გამოყვანის ხედვა და უნარი ხელისუფლებაში, თუ არა ოპოზიციურ სპექტრში მაინც არის“.