პარლამენტი „წამლისა და ფარმაცევტული საქმიანობის შესახებ" კანონში ცვლილებებზე მუშაობს

GMP-ს, ანუ კარგი საწარმოო პრაქტიკის სტანდარტის მოთხოვნა იმპორტირებულ პროდუქტზეც სავალდებულო გახდება, - ამას ითვალისწინებს ჯანმრთელობის დაცვისა და სოციალურ საკითხთა კომიტეტის დღევანდელ სხდომაზე პირველი მოსმენით განხილული „წამლისა და ფარმაცევტული საქმიანობის შესახებ" საქართველოს კანონში ცვლილებების პროექტი.

საქართველოს პარლამენტის ინფორმაციით, საკითხის მომხსენებლის, საქართველოს ოკუპირებული ტერიტორიებიდან დევნილთა, შრომის, ჯანმრთელობის და სოციალური დაცვის მინისტრის მოადგილის, თამარ გაბუნიას განცხადებით, კანონში ცვლილებები ჯანსაღ კონკურენციას შეუწყობს ხელს და ფარმაცევტული პროდუქტის მწარმოებლების, საბითუმო რეალიზატორებისა და ფარმაცევტული პროდუქტის იმპორტიორების მიმართ თანაბარ მიდგომებს უზრუნველყოფს.

„აქამდე საქართველოს კანონმდებლობით GMP-ის სტანდარტი სავალდებულო წესით მხოლოდ ადგილობრივი წარმოების პროდუქციას მოეთხოვებოდა. მიმდინარე წლის 1-ლი იანვრიდან GMP-ს სრულად ამოქმედების მექანიზმი ძალაში შევიდა და მისი ეტაპობრიობა განისაზღვრა. კანონპროექტის შექმნა აუცილებელი გახდა იმისთვის, რომ ჯანსაღ კონკურენციას შეეწყოს ხელი და როგორც იმპორტირებული, ასევე ადგილობრივი პროდუქტები თანაბარ პირობებში აღმოჩნდეს. ასევე, ხარისხის უზრუნველყოფის გარანტიებისთვის მნიშვნელოვანია კარგი საწარმოო პრაქტიკის სერტიფიკატი, ანუ დოკუმენტი მოთხოვნილი იქნას იმპორტირებულ პროდუქტზეც, როგორც ბაზარზე დაშვების წინაპირობა. ამდენად მთავარი ცვლილება, რომელიც ამ პროექტით არის წარმოდგენილია, შეეხება დაშვების წინაპირობა GMP სტანდარტის მოთხოვნას", - განაცხადა თამარ გაბუნიამ მთავრობის საკანომდებლო ინიციატივის წარდგენისას.

როგორც მომხსენებელმა აღნიშნა, ფარმაცევტული პროდუქტის მწარმოებლებისა და საბითუმო რეალიზატორებისათვის, მიმდინარე წლის პირველი იანვრიდან, ძალაში შევიდა GMP (კარგი საწარმოო პრაქტიკა) და GDP (კარგი სადისტრიბუციო პრაქტიკა) სტანდარტის მოთხოვნები. თუმცა GMP-ის (კარგი საწარმოო პრაქტიკა) სერტიფიკატი სავალდებულო წესით, იმპორტირებული ფარმაცევტული პროდუქტებისთვის არ მოითხოვება, რაც მათ ფარმაცევტული პროდუქტის მწარმოებლებსა და საბითუმო რეალიზატორებთან მიმართებაში პრივილეგირებულ მდგომარეობაში აყენებს.

თამარ გაბუნიას განცხადებით, მოცემული ეტაპისთვის, ფარმაცევტული პროდუქტის იმპორტიორებისთვის GMP-ის (კარგი საწარმოო პრაქტიკის) სტანდარტით წარმოების დამადასტურებელი საბუთის მოთხოვნა მიზანშეწონილად მიიჩნიეს, რათა ფარმაცევტული პროდუქტის მწარმოებლებს, საბითუმო რეალიზატორებსა და ფარმაცევტული პროდუქტის იმპორტიორებს შორის თანაბარი მიდგომები იქნეს უზრუნველყოფილი.

მომხსენებლის ინფორმაციით, გათვალისწინებულია გარკვეული გარდამავალი პერიოდი იმისთვის, რომ უკვე ბაზარზე არსებული იმპორტირებული პროდუქტებისთვის GMP სტანდარტის მოთხოვნებთან შესაბამისობის უზრუნველყოფის მიზნით, ეტაპები და პირობები დეტალურად განისაზღვროს.

კანონპროექტს პარლამენტი დაჩქარებული წესით იხილავს.

როგორც მინისტრის პირველმა მოადგილემ განაცხადა, კანონპროექტის დაჩქარებული წესით განხილვის მოთხოვნა იმას უკავშირდება, რომ უკვე ამოქმედებულია ადგილობრივი GMP-ის ვადები, აქედან გამომდინარე იმისთვის, რომ პარალელურად იმპორტირებულ პროდუქტზე GMP-ის სტანდარტების ამოქმედება მოხდეს, მნიშვნელოვანია, რომ ეს ცვლილებები მოკლე პერიოდში განხორციელდეს.

საქართველოს პარლამენტის ინფორმაციით, კომიტეტის თავმჯდომარე დიმიტრი ხუნდაძე მიიჩნევს, რომ კანონპროექტის მიღების შედეგად, ფარმაცევტული პროდუქტის მწარმოებლების, საბითუმო რეალიზატორებისა და ფარმაცევტული პროდუქტის იმპორტიორების მიმართ GMP-ის სტანდარტის მოთხოვნის კუთხით ერთიანი მიდგომა შეიქმნება, რაც ფარმაცევტულ ბაზარზე სამართლიან კონკურენციასა და ხარისხის სტანდარტების დამკვიდრებას ხელს შეუწყობს. ეს მოსაზრება კომიტეტის სხვა წევრებმაც გაიზიარეს.

კომიტეტმა კენჭისყრის შედეგად, „წამლისა და ფარმაცევტული საქმიანობის შესახებ" საქართველოს კანონში ცვლილების შეტანის თაობაზე კანონპროექტის პარლამენტის პლენარულ სხდომაზე პირველი მოსმენით განსახილველად გატანას მხარი დაუჭირა.

ემილ ავდალიანი - ის, რაც დღეს ხდება საქართველოში თუ ქვეყნის საგარეო პოლიტიკაში, რუსეთს უნდა აწყობდეს, რადგან ასეთი შედარებით ქაოტური ვითარება მოსკოვს ბევრ საშუალებას აძლევს
აკადემიკოსი რამაზ ხუროძე - საჭიროა სახელმწიფოს მიერ მეცნიერებაზე გაწეული ხარჯების ეფექტიანობის შეფასება და შესაბამისად, ამ ხარჯების კორექტირება
ქართული პრესის მიმოხილვა 24.05.2024
„გალფის“ მხარდაჭერით 20 სტუდენტი აფხაზეთიდან ევროპის ჩემპიონატზე ეროვნული ნაკრების მატჩზე დასასწრებად გერმანიაში გაემგზავრება
„თიბისის“ მხარდაჭერით, ანტიკური კოლხეთის ქალაქი - ვანი, ეტრუსკული ცივილიზაციისადმი მიძღვნილ გამოფენას მასპინძლობს
BTU-ს AI-ს საბაკალავრო პროგრამას აკრედიტაცია მიენიჭა