ეს ადამიანები, რომლებმაც წერილი გაუგზავნეს პუტინს, მეხუთე კოლონაა, თანამედროვე სერგო ორჯონიკიძეები და ფილიპე მახარაძეები - ესენი არიან 21-ე საუკუნის მოღალატეები, ირმა ინაშვილის თამადობით,- ასე ეხმიანება „მოქალაქეების“ დეპუტატი ალეკო ელისაშვილი ირმა ინაშვილის და რამდენიმე ორგანიზაციის ღია წერილს ვლადიმერ პუტინის მიმართ.

მისი თქმით, თუ ვინმეს აინტერესებს ვინ არიან საქართველოს მოღალატეები, უნდა ნახონ წერილი, რომელსაც 53-მა ადამიანმა მოაწერა ხელი.

„შეიძლება, ამ ვითარებაში გამოხვიდე და პუტინს - თქვენო აღმატებულებავ უწოდო ქართველმა ადამიანმა? ასეთი მოღალატეები, მეხუთე კოლონა ისტორიულად გვყავდა - სერგო ორჯონიკიძეც და ფილიპე მახარაძეც სიმღერ-სიმღერით შემოუძღვნენ წითელ არმიას. ესენი არიან 21-ე საუკუნის მოღალატეები, ირმა ინაშვილის თამადობით. ვეტერანი ადამიანი რომ პუტინს მიმართავ და იტყვი, ნატო-ში არ უნდა მიგვიღონო, ვეტერანმა, რომელიც აფხაზეთსა და ოსეთში ნაომარი იყო, ეს რა ნამუსით დაწერა. ეს 53 ადამიანი არის მოღალატე, გამარჯობა არ უნდა ვუთხრათ, წავიდნენ და დონეცკში გადასახლდნენ, ტაში იქიდან უკრან, თავის აღმატებულებას,"- განაცხადა ელისაშვილმა.

ცნობისათვის, ირმა ინაშვილმა და რამდენიმე ორგანიზაციამ რუსეთის პრეზიდენტს ღია წერილით მიმართა. წერილში ნათქვამია, რომ ხელმომწერები ემხრობიან საქართველოს და უკრაინის სამხედრო ნეიტრალიტეტს და რუსეთთან ურთიერთობის დათბობა სურთ.