შავი ზღვა არის ერთ-ერთი ის ადგილი, სადაც საქართველომ შეიძლება თავისი პოტენციალი გაზარდოს. ამისთვის ყველა ელემენტი გაგვაჩნია, - ამის შესახებ საქართველოს პრეზიდენტმა სალომე ზურაბიშვილმა საერთაშორისო მედიასთან შეხვედრისას განაცხადა.

თუმცა, როგორც საქართველოს პრეზიდენტმა აღნიშნა, საქართველო ყველაფერს უნდა აკეთებდეს იმისთვის, რომ შავ ზღვაზე კონფრონტაცია თავიდან აიცილოს.

„ბუნებრივია, შავი ზღვა არის ერთ-ერთი ის ადგილი, სადაც საქართველომ შეიძლება გაზარდოს თავისი პოტენციალი, ყველა ელემენტი გაგვაჩნია იმისთვის, რომ ეს მოხდეს. მაგრამ ეს არის ის ადგილიც, სადაც ნაკლებად გვჭირდება დაძაბულობა. მეტი თანამშრომლობა გვჭირდება იმიტომ, რომ ეს ის ადგილია, სადაც ყველა მსხვილი ინფრასტრუქტურული პროექტი, იქნება ეს ევროკავშირიდან თუ სხვა, სამომავლოდ უნდა განხორციელდეს. ამ გზით უნდა დავუკავშირდეთ კავკასიის რეგიონი უკრაინას და ევროპას, ამ ზღვების საშუალებით, რომ ღია კარის პოლიტიკით ვისარგებლოთ. ყველა ეს პროექტი, იქნება ეს ტრანზიტი, თუ ენერგეტიკული, დამოკიდებულია მშვიდობიანი და არაკონფრონტაციული პოლიტიკის განხორციელებაზე. ეს იცის რუსეთმაც. უნდა გვაწუხებდეს და ყველაფერს უნდა ვაკეთებდეთ იმისთვის, რომ შავ ზღვაზე კონფრონტაცია თავიდან ავიცილოთ“, - განაცხადა საქართველოს პრეზიდენტმა.