ჩვენი პრინციპული პოზიციაა, პირველ ეტაპზე, რიგგარეშე სხდომა იყოს დახურულ ფორმატში, რომ დისკუსია იყოს მაქსიმალურად საქმიანი, პოპულიზმისგან დაცლილი და შედეგებზე ორიენტირებული , - ამის შესახებ ჟურნალისტებთან "საქართველოსთვის" დეპუტატმა ბექა ლილუაშვილმა განაცხადა.

მისი თქმით, მათ რიგგარეშე სხდომის მოწვევას ხელი მოაწერეს, თუმცა, მნიშვნელოვნად თვლიან, სხდომა დახურულ ფორმატში წარიმართოს.

ლილუაშვილი განმარტავს, რომ პოლიტიკოსებმა პარტიული ინტერესები გვერდით უნდა გადადონ.

"რაც დღეს უკრაინაში ხდება, არის იმ აგრესიის გაგრძელება, რაც რუსეთმა საქართველოს წინააღმდეგ 2008 წელს განახორციელა, ის დღეს აწარმოებს ფართომასშტაბიან ომს დამოუკიდებელი, სუვერენული სახელმწიფოს წინააღმდეგ და ეს არის უმძიმესი გეოპოლიტიკური მოცემულობა. საერთაშორისო საზოგადოების სრული კონსოლიდაციაა საჭირო იმისთვის, რომ ყველანაირი საშუალებები დაუპირისპირონ ამ გამოწვევას და სიტუაციის სწრაფი დეესკალაცია მოხდეს. ჩვენი ქვეყნის შიდა პოლიტიკური პროცესები უნდა წარიმართოს იმგვარად, რომ ყველა პოლიტიკური პარტიის თითოეულმა წარმომადგენელმა გვერდზე გადადოს პოლიტიკური ინტერესები და მოხდეს საზოგადოების სრული კონსოლიდაცია, მათ შორის, გაიმართოს სერიოზული დისკუსიები ხელისუფლებასთან ოპოზიციის ჩართულობით იმისთვის, რომ ჩვენ ყველაფერი გავაკეთოთ სხვადახვა რისკების თავიდან ასაცილებლად. უკრაინის კონტექსტი რა თქმა უნდა, პირდაპირ განსაზღვრავს საქართველოს მომავალი განვითარების გზასაც. ეს დისკუსია ძალიან მნიშვნელოვანია, ჩვენ შევუერთდით ასევე მოთხოვნას რიგგარეშე სესიის ჩანიშვნასთან დაკავშირებით, თუმცა, ჩვენი პრინციპული პოზიციაა, რომ პირველ ეტაპზე სხდომა იყოს დახურულ ფორმატში, რომ დისკუსია იყოს მაქსიმალურად საქმიანი, პოპულიზმისგან დაცლილი და შედეგებზე ორიენტირებული, ამიტომ ჩვენი პრინციპული პოზიციაა, რომ სხდომა იყოს დახურული", - განაცხადა ლილუაშვილმა.