ოკუპირებული ცხინვალის რეგიონში 10 აპრილს ე.წ. საპრეზიდენტო არჩევნები გაიმართება. საარჩევნო უბნებზე უსაფრთხოებას დე ფაქტო შინაგან საქმეთა სამინისტროს 600-ზე მეტი თანამშრომელი დაიცავს. ამის შესახებ ინფორმაციას „ტასი“ ე.წ. სამინისტროზე დაყრდნობით ავრცელებს. მათივე ინფორმაციით, საზოგადოებრივი წესრიგის დაცვაში ჩართულია „სამინისტროს“ ყველა ქვედანაყოფის თანამშრომელი, საარჩევნო უბნების შესასვლელებში ამომრჩევლებს მეტალოდეტექტორებით შეამოწმებენ, ცხინვალის ქუჩებში კი მილიციის დამატებითი ძალები იმუშავებს.
დე ფაქტო უწყებაში ასევე განაცხადეს, რომ დღეს საარჩევნო უბნები შემოწმდება, რისთვისაც სპეციალურ ტექნიკას და ძაღლებს გამოიყენებენ, რის შემდეგადც უბნებზე მილიციის სადღეღამისო მორიგეობა დაიწყება.
ე.წ. საპრეზიდენტო არჩევნების 10 აპრილს ჩატარების შესახებ დე ფაქტო პარლამენტმა გადაწყვეტილება 21 იანვარს მიიღო. ე.წ. საარჩევნო ადმინისტრაციამ კანდიდატების რეგისტრაცია 15 მარტს დაასრულა. კენჭისყრაში მონაწილეობენ მოქმედი დე ფაქტო პრეზიდენტი ანატოლი ბიბილოვი, ე.წ. პარლამენტის ვიცე-სპიკერი ალექსანდრ პლიევი, პოლიტიკური პარტია „ნიხასის“ ლიდერი ალან გაგლოევი, „დეპუტატი“ გარი მულდაროვი და ყოფილი „დეპუტატი“ დიმიტრი ტასოევი. აღსანიშნავია, რომ ყოფილ დე ფაქტო პრეზიდენტს ედუარდ კოკოითს „არჩევნებში“ მონაწილეობის უფლება არ მიეცა.