რუმინეთის, სლოვენიის, მონტენეგროს, ხორვატიის და სერბეთის საგარეო უწყების ხელმძღვანელები ილია დარჩიაშვილს საგარეო საქმეთა მინისტრის თანამდებობაზე დანიშვნას ულოცავენ. ინფორმაციას ამის შესახებ საქართველოს საგარეო საქმეთა სამინისტრო ავრცელებს.

რუმინეთის საგარეო საქმეთა მინისტრი ბოგდან აურესკუ ილია დარჩიაშვილს მისალოც წერილს უგზავნის:

“მჯერა, რომ ჩვენ ჩვენს ქვეყნებს შორის თანამშრომლობის გაღრმავებისა და საქართველოს ევროპული და ევროატლანტიკური მისწრაფებების ხელშეწყობისთვის მყარი პოლიტიკური დიალოგის გამოყენებას შევძლებთ“, - წერს ბოგდან აურესკუ.

საქართველოს პირველი დიპლომატისადმი გაგზავნილ ოფიციალურ მიმართვაში, სლოვენიის საგარეო საქმეთა მინისტრი ანჟე ლოგარი აღნიშნავს, რომ საქართველოსა და სლოვენიას მეგორული ურთიერთობები და კონსტრუქციული ორმხრივი თანამშრომლობა აკავშირებთ და იმედს გამოთქვამს, რომ საქართველო ევროპული ინტეგრაციის გზაზე სიარულს გააგრძელებს და ქართველი ხალხის სოციალური და ეკონომიკური კეთილდღეობისთვის რეფორმებს განახორციელებს.

თავის მიმართვაში, მონტენეგროს საგარეო საქმეთა მინისტრი, ჯორჯე რადულოვიჩი იმედს გამოთქვამს, რომ ორ ქვეყანას შორის ურთიერთობები ორმხრივი ინტერესის ყველა სფეროში კიდევ უფრო გაღრმავდება. მონტენეგროს პირველი დიპლომატი მისალოც წერილში ასევე საქართველოს სუვერენიტეტისა და ტერიტორიული მთლიანობის მიმართ მონტენეგროს ურყევ მხარდაჭერას ადასტურებს.

ილია დარჩიაშვილს საგარეო უწყების ხელმძღვანელის პოსტზე დანიშვნას ასევე ხორვატიის რესპუბლიკის საგარეო და ევროპულ საქმეთა მინისტრი, გორდან გრლიჩ რადმანიც ულოცავს. იგი იმედს გამოთქვამს, რომ ორ ქვეყანას შორის არსებული თანამშრომლობა მომავალში კიდევ უფრო გაღრმავდება. ხორვატიის საგარეო და ევროპულ საქმეთა მინისტრი მისალოც წერილში საქართველოს ევროპული და ევროატლანტიკური მისწრაფებების მიმართ ხორვატიის მტკიცე მხარდაჭერას კიდევ ერთხელ ადასტურებს.

ილია დარჩიაშვილისადმი გაგზავნილ ოფიციალურ წერილში, სერბეთის რესპუბლიკის საგარეო საქმეთა მინისტრი ნიკოლა სელაკოვიჩი წერს: „მჯერა, რომ ერთობლივი ძალისხმევით ჩვენ ორ ქვეყანას შორის ტრადიციულად მეგობრული ურთიერთობების შემდგომ გაღრმავებას ხელს შევუწყობთ“,- აღნიშნულია გავრცელებულ ინფორმაციაში.