ჩვენს საზოგადოებას ბევრჯერ აქვს ნათქვამი, რომ არა რევოლიციური სცენარებით, არამედ არჩევნების გზით სურს ხელისუფლების ცვლილება. ის, რომ მიხეილ სააკაშვილის თუ „ნაციონალური მოძრაობის" მოწოდების შედეგად, 200 000 ადამიანი გამოვა და ხელისუფლებას შეცვლიან, არასერიოზულია,- ამის შესახებ პარტია „საქართველოსთვის" წევრმა, ანა ბუჩუკურმა განაცხადა.

როგორც მან აღნიშნა, როცა საზოგადოებაში არსებულ მუხტზე ვსაუბრობთ, უნდა გაიმიჯნოს საპროტესტო და უკმაყოფილების მუხტი.

„საპროტესტო აქციებზე ადამიანების რაოდენობას პოლიტიკური პარტია არ და ვერ განსაზღვრავს, ეს დამოკიდებულია პოლიტიკურ პროცესებზე. მაგალითისთვის, უკრაინის მხარდამჭერ აქციებზე რა რაოდენობის ადამიანებიც გამოვიდნენ, ეს პოლიტიკოსების მოწოდების შედეგად არ მომხდარა, მათ ჰქონდათ ეს უკრაინის მუხტი მხარდაჭერის და მათ შორის, ამ ადამიანთა რაოდენობა განსაზღვრა ღარიბაშვილის სამარცხვინო განცხადებებმა. „ნაციონალური მოძრაობის“ მხრიდან ბევრჯერ მოგვისმენია, რომ ძალიან დიდი საპროტესტო აქციით შეცვლიდნენ ხელისუფლებას, ეს ასე არ ხდება, გავიხსენოთ საქართველოს ბოლო 30 წლის ისტორია. რაც შეეხება განწყობებს, მუნიციპალურმა არჩევნების შედეგად, 8 თუ 7 მუნიციპალიტეტში ხალხმა „ქართული ოცნება" გაუშვა ოპოზიციაში, ამასთან, ისინი მესამე ვადით არიან ხელისუფლებაში და შეცდომას შეცდომებზე უშვებენ“, - განაცხადა ბუჩუკურმა.