მოლდოვის რეინტეგრაციის ბიურო სეპარატისტულ რეგიონში, დნესტრისპირეთში 25 აპრილს მომხდარ შემთხვევას ეხმიანება და აცხადებს, რომ ინციდენტის მიზანი უსაფრთხოების სფეროში სიტუაციის გამწვავება იყო, - ინფორმაციას ადგილობრივი მედია ავრცელებს.
"დღევანდელი ინციდენტის მიზანი – შექმნილიყო საბაბი დნესტრიპსირეთის რეგიონში, რომელსაც საკონსტიტუციო ხელისუფლება ვერ აკონტროლებს, უსაფრთხოების სფეროში სიტუაციის გამწვავებისთვის. ამ კონტექსტის გათვალისწინებით, რეინტეგრაციის ბიურო მოგიწოდებთ სიმშვიდის შენარჩუნებისკენ და კომპეტენტურ ორგანოებთან ერთად აგრძელებს სიტუაციის განვითარების მონიტორინგს", – აღნიშნული იყო მოლდოვის რეინტეგრაციის ბიუროს განცხადებაში.
შეგახსენებთ, გუშინ მოლდოვის სეპარატისტულ რეგიონში, დნესტრისპირეთში ქალაქ ტირასპოლში ე.წ. სახელმწიფო უსაფრთხოების სამინისტროს შენობაში რამდენიმე აფეთქება მოხდა.
