საქართველომ წლების განმავლობაში დაამტკიცა, რომ ევროკავშირთან ინტეგრაციის გზაზე მოწინავე ქვეყანაა, რასაც ფაქტები ადასტურებს - საქართველოს ბეჯითი მუშაობა უნდა დაფასდეს, - ეს განცხადება ჟურნალისტებთან პარლამენტის თავმჯდომარემ შალვა პაპუაშვილმა გააკეთა.

ამავე კონტექსტში პაპუაშვილმა ხაზგასმით აღნიშნა, რომ საქართველოს დამოუკიდებლობის მიღებასთან ერთად, ევროპული არჩევანი უკვე დიდი ხანია გაკეთებული აქვს, რისთვისაც ქართველ ხალხს დიდი საფასურის გადახდა მოუწია.

სწორედ ამ ორი კომპონენტის გათვალისწინებით, შალვა პაპუაშვილი ამბობს, რომ ევროკავშირის კანდიდატობის სტატუსის მიღებაზე მას პოზიტიური გადაწყვეტილების მოლოდინი აქვს. როგორც პაპუაშვილმა აღნიშნა, საქართველოს ხელისუფლება პროფესიონალურად მუშაობს.

„კითხვარის პირველი ნაწილი ევროკავშირს დღეს გადაეცემა. მუშაობა მეორე ნაწილზე მიდის, რომელიც უფრო მოცულობითია. მთავარია ყველაფერი დროულად და ხარისხობრივად იქნება შესრულებული. შემდეგი ნაბიჯი არის ევროკავშირის მხარის, რათა შევსებული კითხვარის საფუძველზე ევროკავშირის კომისიამ დასკვნა წარმოადგინოს. შემდეგ უკვე საბჭომ გადაწყვეტილება მიიღოს“, - განაცხადა შალვა პაპუაშვილმა.