ბათუმის საქალაქო სასამართლოში, აჭარის მთავრობის სახლთან დაკავებული “ერთიანი ნაციონალური მოძრაობის” წევრების - გიორგი კირთაძის, ლევან ანთაძის, გია აბულაძის, მერაბ ვარშალომიძის და ილია ჯინჭარაძის პროცესი გაიმართა. სასამართლო სხდომაზე დაცვის მხარემ სამართალდამცავებისგან მტკიცებულებების წარდგენა და პოლიციის მაღალჩინოსნების: ირაკლი ბასილაძისა, დავით მაღრაძის და გრიგოლ ბესელიას გამოკითხვა მოითხოვა. მათი თქმით, აღნიშნული მაღალჩინოსნები დაკავებაში უშუალოდ იყვნენ ჩართული.

“მტკიცებულებები პოლიციას არ წარმოუდგენია, ველოდებით. ასევე დრო გვჭირდება მასალების მოსამზადებლად. პოლიციის მაღალჩინოსნების - გრიგოლ ბესელიას და ირაკლი ბასილაძის გამოკითხვას ვითხოვთ. ამასთან, პოლიციის მანქანაში ჩანაწერის წარდგენას”, - აღნიშნეს ადვოკატებმა.

თავის მხრივ, სამართალდამცავებმა განაცხადეს, რომ პოლიციის მანქანაში ჩაწერა არ მიმდინარეობდა.

დაკავებულები სასამართლო დარბაზიდან ხელწერილის საფუძველზე გაათავისუფლეს.

მომდევნო სასამართლო პროცესი 23 მაისს, 12:00 საათზე გაიმართება.

ცნობისთვის, გუშინ აჭარის მთავრობის სახლთან “ერთიანი ნაციონალური მოძრაობის” ლიდერები და მათი მხარდამჭერები მიხეილ სააკაშვილის უცხოეთში სამკურნალოდ გადაყვანი მოთხოვნით აქციას მართავდნენ. მათ პროტესტის ნიშნად კარვები გაშალეს, მოგვიანებით სამართალდამცავებმა კარვები აიღეს, რასაც დაპირისპირება მოჰყვა. სამართალდამცავებმა გუშინ 25 პირი დააკავეს.