გარდაბნის მუნიციპალიტეტის სოფელ მარტყოფში, ტრადიციული სახალხო დღესასწაული "აპარნობა" აღინიშნა. ამის შესახებ ინფორმაციას გარდაბნის მუნიციპალიტეტის მერია ავრცელებს.

მათივე ინფორმაციით, სპორტული ღონისძიებების ფარგლებში აპარნის წმ. გიორგის სახელობის ეკლესიის მიმდებარე ტერიტორიაზე, ცხენოსნობა გაიმართა. შეჯიბრში გამარჯვებული მხედრები, გარდაბნის მუნიციპალიტეტის მერმა დავით კარგარეთელმა, ქვემო ქართლში სახელმწიფო რწმუნებულმა გიორგი დოხტურიშვილმა და საქართველოს პარლამენტის მაჟორიტარმა დეპუტატმა ირაკლი შატაკიშვილმა დააჯილდოეს.

უამინდობის მიზეზით ქართული ჭიდაობა და მკლავჭიდი, ღია სივრცის ნაცვლად, სოფელ მარტყოფის ძიუდოს დარბაზში გაიმართა. შეჯიბრში მონაწილეობა სხვადასხვა ასაკობრივი ჯგუფის სპორტსმენებმა მიიღეს. გამარჯვებულ სპორტსმენებს სიგელები და ფასიანი საჩუქრები გადაეცათ.

,,აპარნობა 2022 გარდაბნის მუნიციპალიტეტის მერიის განათლების, კულტურის, სპორტის, ახალგაზრდობისა და საზოგადოებასთან ურთიერთობის სამსახურისა და ა(ა)იპ სპორტული ცენტრის პატრონაჟით გაიმართა.

ცნობისთვის, აპარნის მიმდებარე ტერიტორიაზე 1625 წელს მოურავ გიორგი სააკაძის მეთაურობით, ყიზილბაშთა მრავალრიცხოვან ლაშქართან ბრძოლა, ქართველების ბრწყინვალე გამარჯვებით დასრულდა. ქართველების გამარჯვება, ისტორიაშია "მარტყოფის ბრძოლის" სახელით შევიდა“, - ნათქვამია ინფორმაციაში.