უკრაინამ ევროკავშირის წევრობის კანდიდატის სტატუსის მისაღებად კითხვარის მეორე ნაწილზე მუშაობა დაასრულა, - ინფორმაციას უკრაინული მედია პრეზიდენტ ვოლოდიმირ ზელენსკის პრესსამსახურზე დაყრდნობით ავრცელებს.

მათივე ინფორმაციით, ვოლოდიმირ ზელენსკი ევროკომისიის პრეზიდენტს, ურსულა ფონ დერ ლაიენს ვიდეო ფორმატში შეხვდა.

„წარვადგინე შევსებული კითხვარის მეორე ნაწილი უკრაინას ევროკავშირში წევრობის კანდიდატის სტატუსის მისაღებად“, - განაცხადა ზელენსკიმ.

მან მადლობა გადაუხადა ევროკომისიის ხელმძღვანელს, ამ „მნიშვნელოვან გზაზე უკრაინის მიმართ მხარდაჭერის მკაფიო სიგნალებისთვის.“

შეგახსენებთ, ვოლოდიმირ ზელენსკიმ უკრაინის ევროკავშირში გაწევრიანების შესახებ განაცხადს ხელი 28 თებერვალს მოაწერა.