ევროკავშირი ვერ გახდება შუამავალი რუსეთსა და უკრაინას შორის მოლაპარაკებებში, - ამის შესახებ ევროკავშირის უმაღლესმა წარმომადგენელმა პოლიტიკისა და უსაფრთხოების საკითხებში ჯოზეფ ბორელმა გერმანულ გაზეთ Frankfurter Allgemeine Zeitung-თან ინტერვიუში განაცხადა.

„ჩვენ არა. რუსები ამას არ მიიღებენ, ისევე როგორც ჩვენ არ მივიღებთ რუსეთს შუამავლად", - განაცხადა ბორელმა კითხვაზე, შეუძლია თუ არა ევროკავშირს შუამავლის როლი შეასრულოს რუსეთ-უკრაინის მოლაპარაკებებში. ამასთან, მან დასძინა, რომ "ჩინეთი ასევე არ არის შესაფერისი, რადგან ის რუსეთისკენ არის მიდრეკილი. თურქეთი კი ძალიან კარგ საქმეს აკეთებს. მას კარგი ურთიერთობა აქვს ორივე მხარესთან".

ბორელის თქმით, საუკეთესო ვარიანტი გაერო იქნებოდა და მოლაპარაკების შედეგი მხოლოდ უკრაინამ, რუსეთმა და შუამავალმა უნდა განსაზღვრონ.

გარდა ამისა, ბორელის თქმით, ევროკავშირი გააგრძელებს უკრაინისთვის იარაღის მიწოდებას და ასევე შეეცდება რუსეთის ეკონომიკის შესუსტებას და ქვეყნის საერთაშორისო იზოლაციას.

რუსეთიდან გაზის მიწოდებაზე შესაძლო ემბარგოს დაწესებასთან დაკავშირებით კი ბორელმა აღნიშნა, რომ „გაზი სტრატეგიული პროდუქტია, რადგან ის არა მხოლოდ ენერგიის წყაროა, არამედ ნედლეულიც ნავთობქიმიური მრეწველობისთვის”.

„ახლა ჩვენ გვჭირდება ახალი მომწოდებლების პოვნა", - განაცხადა ბორელმა.