სომხეთში ოპოზიციამ, რომელიც პრემიერ - მინისტრის ნიკოლ ფაშინიანის გადადგომის მოთხოვნით საპროტესტო აქციებს მართავს, მიიღო გადაწყვეტილება, რომ მოთხოვნის შესასრულებლად მოხდეს არა ქალაქის ქუჩების, არამედ სახელმწიფო სტრუქტურების შენობების ბლოკირება.

ამ მიზნით დღეს მათ ერევნის მერია ერთი საათის განმავლობაში ბლოკირებული ჰქონდათ.

ადგილობრივი მედიის ინფორმაციით, ცოტა ხნის წინ, სომხეთის ოპოზიციამ შენობის ყველა შესასვლელი გაათავისუფლა.

საპროტესტო დემონსტრაციის კოორდინატორმა, მოძრაობა „წინააღმდეგობის" ლიდერმა იშხან საღატელიანმა განაცხადა, რომ ოპოზიცია მერიის შენობას ათავისუფლებს, მაგრამ დაუმორჩილებლობას კვლავაც განაგრძობს

„მინდა გავაფრთხილო მერი, თუ გონს არ მოვა, შემდეგ ჯერზე მერიის შენობის რამდენიმე საათით ბლოკირება მოხდება“, - განაცხადა ოპოზიციონერმა პოლიტიკოსმა.

ამ დროისთვის მომიტინგეები ერევნის ცენტრში მსვლელობას აწყობენ.

სომხეთში საპროტესტო აქციები ნიკოლ ფაშინიანის გადადგომის მოთხოვნით 2 მაისს განახლდა.