უკრაინაში საომარი მოქმედებები დაუყოვნებლივ უნდა შეწყდეს და კონფლიქტის მშვიდობიანი გზით მოგვარებისთვის ხელსაყრელი გარემო უნდა შეიქმნას, - ამის შესახებ აშშ-სა და სამხრეთ-აღმოსავლეთ აზიის ქვეყნების ასოციაციის (Asean) ლიდერებმა ვაშინგტონში გამართული სამიტის შემდეგ განაცხადეს.

მათი მტკიცებით, მხარს უჭერენ უკრაინის სუვერენიტეტსა და ტერიტორიულ მთლიანობას.

„ვადასტურებთ ჩვენს პატივისცემას სუვერენიტეტის, პოლიტიკური დამოუკიდებლობისა და ტერიტორიული მთლიანობის მიმართ“, - ნათქვამია ჯგუფის განცხადებაში.

მათივე მტკიცებით, მხარს უჭერენ გაერო-ს გენერალური მდივნის ძალისხმევას კონფლიქტის მშვიდობიანი გადაწყვეტის ძიებაში.

„ჩვენ ასევე მოვუწოდებთ უკრაინაში ჰუმანიტარული დახმარების სწრაფი, უსაფრთხო და შეუფერხებელი ხელმისაწვდომობის ხელშეწყობისკენ და მშვიდობიანი მოსახლეობის, ჰუმანიტარული ორგანიზაციების თანამშრომლებისა და მოწყვლად სიტუაციებში მყოფი პირების დაცვისკენ,“- აღნიშნულია განცხადებაში.